Pakistan : ఇంగ్లండ్‌తో జరిగిన మూడు టెస్టుల సిరీస్‌లో పాకిస్థాన్‌ ఘోర పరాజయాన్ని చవి చూసింది. శనివారం బర్మింగ్‌హామ్‌లో ముగిసిన మూడో టెస్టులో ఇంగ్లండ్‌ 8 వికెట్ల తేడాతో గెలిచింది. దీంతో సిరీస్‌ను పాకిస్థాన్‌ 0-3తో కోల్పోయింది. 130 పరుగుల లక్ష్యాన్ని పాకిస్థాన్‌ కాపాడుకోలేకపోయింది. నాలుగో రోజు ఆట ప్రారంభమైన తొలి ఓవర్‌లోనే ఇంగ్లండ్‌ ఓపెనర్లిద్దరినీ డకౌట్‌ చేసినప్పటికీ, ఆ తర్వాత పాకిస్థాన్‌ బౌలర్లు మ్యాచ్‌ను తమ చేతుల్లోకి తీసుకోలేకపోయారు.
Also Read : మేము పోటీ చేయం.. మాజీ సీఎంకు టీఎంసీ తిరుగుబాటు నేతల సంచలన ఆఫర్‌!
ఈ ఓటమితో పాకిస్థాన్‌కు మరో పెద్ద అవమానం ఎదురైంది. ఇంగ్లండ్‌ గడ్డపై టెస్ట్‌ సిరీస్‌లో పాకిస్థాన్‌ వైట్‌వాష్‌ కావడం ఇదే తొలిసారి. 1954లో తొలిసారి ఇంగ్లండ్‌లో టెస్ట్‌ సిరీస్‌ ఆడిన పాకిస్థాన్‌.. ఇప్పటివరకు అక్కడ 18 సిరీస్‌లు ఆడింది. అయితే 72 ఏళ్ల చరిత్రలో తొలిసారి 0-3తో సిరీస్‌ను కోల్పోయింది. లీడ్స్‌లో జరిగిన తొలి టెస్టులో ఇంగ్లండ్‌ ఇన్నింగ్స్‌ 103 పరుగుల తేడాతో గెలిచింది. లార్డ్స్‌లో జరిగిన రెండో టెస్టులో 194 పరుగుల తేడాతో విజయం సాధించింది. ఇక బర్మింగ్‌హామ్‌లో జరిగిన మూడో టెస్టులో 8 వికెట్ల తేడాతో గెలిచి సిరీస్‌ను క్లీన్‌స్వీప్‌ చేసింది.
ఇంగ్లండ్‌లో టెస్ట్‌ సిరీస్‌లో పాకిస్థాన్‌ గతంలో ఎదుర్కొన్న అతిపెద్ద ఓటమి 1962లో వచ్చింది. ఆ ఐదు టెస్టుల సిరీస్‌లో పాకిస్థాన్‌ 0-4తో ఓడిపోయింది. 2006లో నాలుగు టెస్టుల సిరీస్‌లో 0-3తో, 2010లో 1-3తో పాకిస్థాన్‌ ఓటమిపాలైంది. వరల్డ్‌ టెస్ట్‌ ఛాంపియన్‌షిప్‌ ఫైనల్‌ అవకాశాలు కీలకంగా ఉన్న సమయంలో పాకిస్థాన్‌ జట్టు మూడు విభాగాల్లోనూ ఇంగ్లండ్‌ ముందు పూర్తిగా తేలిపోయింది. మూడో టెస్టు రెండో ఇన్నింగ్స్‌ను మినహాయిస్తే, మిగతా ఇన్నింగ్స్‌ల్లో పాకిస్థాన్‌ 200 పరుగులు కూడా చేయలేకపోయింది. తొలి రెండు టెస్టులు మూడు రోజుల్లోనే ముగిశాయి.
అయితే పాకిస్థాన్‌కు ఈ సిరీస్‌లో కొంత ఊరట ఇచ్చిన అంశాలు కూడా ఉన్నాయి. యువ ఆటగాడు రజావుల్లా అరంగేట్ర టెస్టులోనే ఆకట్టుకున్నాడు. బర్మింగ్‌హామ్‌ టెస్టు తొలి ఇన్నింగ్స్‌లో నాలుగు వికెట్లు తీసిన అతడు, రెండో ఇన్నింగ్స్‌లో తొమ్మిదో స్థానంలో బ్యాటింగ్‌ చేస్తూ 81 పరుగులు చేశాడు. మరోవైపు 36 ఏళ్ల మహ్మద్‌ అబ్బాస్‌ కూడా తన బౌలింగ్‌తో సత్తా చాటాడు. మూడు టెస్టుల్లో 13 వికెట్లు తీసిన అతడు, లార్డ్స్‌ టెస్టులో ఐదు వికెట్ల ప్రదర్శన ఇచ్చాడు. ఈ సిరీస్‌లో అత్యుత్తమ ఆటగాడి అవార్డును కూడా అబ్బాస్‌ సొంతం చేసుకున్నాడు.
Also Read : త్వరలో గ్లోబల్ ట్రెడ్ కు కేరాఫ్ గా భారత్.. మోదీ కీలక కామెంట్స్!
