Ram Gopal Varma : రామ్ గోపాల్ వర్మ, ఊర్మిళా మటోండ్కర్ రహస్య వివాహం చేసుకున్నారంటూ వస్తున్న వార్తలు ప్రస్తుతం బాలీవుడ్లో మరోసారి చర్చనీయాంశంగా మారాయి. 1990లలో వీరిద్దరి రిలేషన్షిప్పై రకరకాల ఊహాగానాలు రాగా, తాజాగా సీనియర్ జర్నలిస్ట్ జ్యోతి వెంకటేష్ చేసిన వ్యాఖ్యలు ఈ వివాదానికి మళ్లీ తెరలేపాయి. సిద్ధార్థ్ కణ్ణాన్ యూట్యూబ్ ఛానెల్లో జరిగిన ఇంటర్వ్యూలో జ్యోతి వెంకటేష్ మాట్లాడుతూ.. మెగాస్టార్ చిరంజీవి తనకు ఈ రహస్య వివాహం గురించి చెప్పినట్లు వెల్లడించారు. ‘జెంటిల్మెన్’ సినిమా షూటింగ్ సమయంలో చిరంజీవిని కలిసినప్పుడు.. “రామ్ గోపాల్ వర్మ, ఊర్మిళ వివాహం గురించి జర్నలిస్ట్ అయిన నువ్వు ఎందుకు రాయలేదు?” అని చిరంజీవి తనను అడిగినట్లు ఆయన తెలిపారు.
ఈ వార్త విని ఆశ్చర్యపోయిన జ్యోతి వెంకటేష్ ఆధారాలు అడగగా.. ఆంధ్రప్రదేశ్లోని ఒక ఆలయంలో వీరి వివాహం జరిగిందని, ఆ పూజారి ఫోన్ నంబర్ కూడా చిరంజీవి తనకు ఇచ్చారని తెలిపారు. అయితే ఈ వార్తను ప్రచురించే ముందు నిర్ధారణ కోసం ఊర్మిళకు ఫోన్ చేయగా, ఆమె ఏడ్చేశారని జ్యోతి వెంకటేష్ పేర్కొన్నారు. “ఇండస్ట్రీకి వచ్చినప్పటి నుంచి నువ్వు నన్ను చూస్తున్నావు, నా గురించి ఇలా ఎలా రాయగలవు?” అని ఆమె అడిగినట్లు చెప్పారు. ఈ విషయంపై వివరణ కోరడానికి వర్మను సంప్రదించగా ఆయన మాట్లాడేందుకు నిరాకరించినట్లు తెలిపారు.
రామ్ గోపాల్ వర్మ, ఊర్మిళ విడిపోవడానికి ప్రధాన కారణం కూడా జ్యోతి వెంకటేష్ వెల్లడించారు. ఊర్మిళ వర్మను లీగల్గా పెళ్లి చేసుకోవాలని కోరుకుందని, కానీ అప్పట్లో వర్మ ఆ నిర్ణయానికి సిద్ధంగా లేకపోవడం వల్లే ఇద్దరి మధ్య మనస్పర్థలు వచ్చి విడిపోయినట్లు ఆయన తెలిపారు. 1990ల నుంచి 2000 ప్రారంభం వరకు ఈ జంట ఎన్నో సినిమాల్లో కలిసి పనిచేశారు. ‘రంగీలా’, ‘దౌడ్’, ‘సత్య’, ‘ప్యార్ టూనే క్యా కియా’ వంటి చిత్రాలు వీరిద్దరి కలయికలో వచ్చాయి. ఆ సమయంలో వీరిద్దరి మధ్య సంబంధం పనిని మించిపోయిందని, దీనివల్ల వర్మ అప్పటి భార్య రత్న వర్మతో వివాహ బంధం దెబ్బతిన్నదని అప్పట్లో వార్తలు వచ్చాయి.
కాగా, తన ఆటోబయోగ్రఫీ ‘గన్స్ అండ్ థైస్: ది స్టోరీ ఆఫ్ మై లైఫ్’ పుస్తకంలో ఊర్మిళపై తనకున్న ప్రత్యేక అభిమానాన్ని వర్మ బహిరంగంగానే పంచుకున్నారు. పుస్తకంలో ‘ఉమెన్ ఇన్ మై లైఫ్’ అనే ప్రత్యేక చాప్టర్ను ఊర్మిళకే అంకితం చేస్తూ.. ఆమె అందానికి తాను ఎంతగా ముగ్ధుడైంది అందులో రాసుకొచ్చారు. ఆ ఆకర్షణే తనను ‘రంగీలా’ చిత్రంలో ఆమెను హీరోయిన్గా తీసుకునేలా ప్రేరేపించిందని ఆయన తెలిపారు.
