Tamil Nadu : తమిళనాడులో మరోసారి హిందీ వివాదం నెలకొంది. తమిళనాడులో రోడ్డు పక్కన ఏర్పాటు చేసిన హిందీ సైన్ బోర్డులు ఈ వివాదానికి దారి తీశాయి. హిందీతో పాటు తమిళం, ఇంగ్లిష్‌లో బోర్డులు పెట్టడంపై ప్రతిపక్ష పార్టీలు ప్రభుత్వంపై విమర్శలు చేశాయి. దీంతో ఈ వ్యవహారంలో ఇద్దరు హైవేస్ అధికారులను ప్రభుత్వం సస్పెండ్ చేసింది.
Also Read : చహల్ సంచలన నిర్ణయం.. క్రికెట్‌కు గుడ్‌బై!
ఇంతకు ఏం జరిగిందంటే.. తూత్తుకుడి జిల్లాలోని సాత్తాన్‌కులం-నజరేత్ రాష్ట్ర రహదారిపై ఇటీవల కొత్త సైన్ బోర్డులు ఏర్పాటు చేశారు అధికారులు. అయితే వాటిపై తమిళం, ఇంగ్లిష్‌తో పాటుగా హిందీలో కూడా వివరాలు ఉన్నాయి. ఈ బోర్డులకు సంబంధించిన వీడియోలు సోషల్ మీడియాలో వైరల్ కావడంతో ఈ విషయం కాస్త బయటకు వచ్చింది. దీంతో ప్రభుత్వం వెంటనే స్పందించింది. హైవేస్ శాఖకు చెందిన అసిస్టెంట్ ఎగ్జిక్యూటివ్ ఇంజినీర్, అసిస్టెంట్ ఇంజినీర్ ఈ బోర్డుల్లో హిందీని చేర్చినట్లు ప్రభుత్వం తెలిపింది. తమిళనాడులో అమల్లో ఉన్న రెండు భాషల విధానానికి ఇది విరుద్ధమని పేర్కొంది.
ఈ ఇద్దరు అధికారులను సస్పెండ్ చేయడంతో పాటు వారిపై శాఖాపరమైన చర్యలు కూడా తీసుకుంటున్నట్లు ప్రభుత్వం తెలిపింది. ప్రభుత్వ భాషా విధానానికి వ్యతిరేకంగా పనిచేసే అధికారులపై కఠిన చర్యలు తీసుకుంటామని హెచ్చరించింది. ఈ ఘటనపై ప్రతిపక్ష డీఎంకే, పీఎంకే కూడా ప్రభుత్వాన్ని ప్రశ్నించాయి. హిందీ బోర్డులు పెట్టిన వారిపై చర్యలు తీసుకోవాలని డిమాండ్ చేశాయి.
డీఎంకే అధ్యక్షుడు ఎంకే స్టాలిన్ మాట్లాడుతూ.. ఇప్పటివరకు కేంద్రం నుంచి హిందీని రుద్దే ప్రయత్నాలను తమిళనాడు ఎదుర్కొంటూ వచ్చిందని అన్నారు. ఇప్పుడు రాష్ట్ర ప్రభుత్వమే ఆ పని చేస్తున్నట్లుగా కనిపిస్తోందని విమర్శించారు. ఈ వ్యవహారంపై బీజేపీ, అన్నాడీఎంకే నుంచి మాత్రం వెంటనే ఎలాంటి స్పందన రాలేదు.
Also Read : ఏంటి నిజమా? బ్యాంకులకు ప్రతి శనివారం సెలవా?.. నిజమెంత?
