Vande Mataram Bill 2026 : భారతదేశం జాతీయ గీతం ‘జన గణ మన’ ను దేవ ప్రజలంతా గౌరవిస్తారు. జాతీయ గీతాన్ని అవమానపరిచినా, అగౌరవపరిచినా శిక్షలు ఉంటాయి. తాజాగా అదే తరహాలోనే ‘వందేమాతరం’కు కూడా ఇకపై చట్టపరమైన రక్షణ లభించింది. ‘ప్రివెన్షన్ ఆఫ్ ఇన్సల్ట్స్ టు నేషనల్ హానర్ బిల్లు’కు రాష్ట్రపతి ద్రౌపది ముర్ము ఈ రోజు (మంగళవారం) ఆమోదం తెలిపారు. దీంతో ఈ బిల్లు చట్టంగా మారినట్లయింది.
దీనికోసం 1971 నాటి బిల్లులోని సెక్షన్ 3ను సవరించారు. దీని ద్వారా ‘వందేమాతరం’ను కూడా చట్టం పరిధిలోకి తీసుకొచ్చారు. జాతీయ గీతాన్ని అడ్డుకోవడం లేదా దాని గౌరవాన్ని భంగపరిచేలా వ్యవహరిస్తే చట్టపరమైన చర్యలకు అవకాశం ఉండనుంది. అయితే ఇప్పటివరకు ఆ స్థాయిలో వందేమాతరానికి ప్రత్యేక రక్షణ లేదు. దీనికోసం కేంద్రం పార్లమెంట్లో సవరణ తీసుకువచ్చింది. ఈ సవరణ ద్వారా జనగణమన లాగే వందేమాతరానికి కూడా చట్ట పరమైన రక్షణ కల్పించినట్లయింది.
ఈ కొత్త చట్టం ప్రకారం ‘వందేమాతరం’ పాడుతున్న సమయంలో ఉద్దేశపూర్వకంగా అడ్డుకోవడం లేదా ఆ గానం చేస్తున్న సమూహానికి అంతరాయం కలిగించడం చేసినట్లయితే శిక్షార్హమైన నేరం కింద పరిగణిస్తారు. దీనికి మూడేళ్ల వరకు జైలు శిక్ష, జరిమానా లేదా రెండూ విధించే అవకాశం ఉంటుందనేది ఈ చట్టం చెబుతోంది.. వందేమాతరానికి చట్టపరమైన రక్షణ కల్పించే సవరణ బిల్లును గత నెలలోనే పార్లమెంట్ ఆమోదించింది. అనంతరం రాష్ట్రపతి ఆమోదం కోసం పంపగా నేడు రాష్ట్రపతి ముర్ము సంతకం చేయడంతో బిల్లు ఇప్పుడు అధికారిక చట్టంగా అమల్లోకి వచ్చినట్లయింది.
