SIR Votes: తెలంగాణలో సమగ్ర సవరణ (Special Intensive Revision – SIR) ప్రక్రియ జరుగుతుండటంతో, సోషల్ మీడియాలో భారీగా ఓట్లు తొలగిస్తున్నారనే పుకార్లు షికారు చేస్తున్నాయి. దీనిపై ప్రజల్లో తీవ్ర ఆందోళన వ్యక్తమవుతుంది. హైదరాబాద్‌లో సుమారు 20 లక్షల ఓట్లు రద్దు చేశారంటూ ప్రచారం జరుగుతోంది. అయితే ఈ ప్రచారంలో ఎలాంటి వాస్తవం లేదని అధికారులు అంటున్నారు. అది పూర్తిగా అబద్ధమని స్పష్టం చేశారు.

సాధారణంగా జరిగే ఓటర్ల జాబితా సవరణ ప్రక్రియకు “స్పెషల్ ఇంటెన్సివ్ రివిజన్ (SIR)” అనే ప్రత్యేక పేరు పెట్టడంతో ప్రజల్లో అనేక అనుమానాలు మొదలయ్యాయి. రాబోయే రోజుల్లో తమ ఓటు హక్కు ఉంటుందో లేదోనని పలువురు ఓటర్లు కంగారు పడుతుండగా, రాజకీయ వర్గాల్లోనూ ఈ ప్రక్రియపై తీవ్ర చర్చ నడుస్తోంది.

రాష్ట్రంలో అధికారంలో ఉన్న కాంగ్రెస్ పార్టీ ఈ SIR ప్రక్రియపై పలు అనుమానాలు వ్యక్తం చేస్తోంది. ఈ సర్వే పేరుతో నిర్దిష్ట వర్గాల లేదా ముస్లింల ఓట్లను భారీగా తొలగించేందుకు కేంద్రంలోని అధికార పార్టీ కుట్ర పన్నుతోందని కాంగ్రెస్ ఆరోపిస్తోంది. ఈ వ్యవహారంపై ముఖ్యమంత్రి రేవంత్ రెడ్డితో పాటు ఢిల్లీ కాంగ్రెస్ హైకమాండ్ కూడా తీవ్ర ఆందోళన చెందుతోంది.

ఈ సర్ (SIR) ప్రక్రియ జూన్ 25వ తేదీన ఇంటింటి ఎన్యూమరేషన్‌తో ప్రారంభమైంది. సరిగ్గా ఈ సమయంలోనే హైదరాబాద్‌లో దాదాపు 20 లక్షల ఓట్లను రద్దు చేశారంటూ సోషల్ మీడియాలో వార్తలు వైరల్ అయ్యాయి. అయితే ప్రస్తుతం ఈ ప్రక్రియ ఇంకా కొనసాగుతుండటం, అధికారులు ఎలాంటి అధికారిక సమాచారం ఇవ్వకపోవడంతో ఈ 20 లక్షల సంఖ్య కేవలం ఒక పుకారు మాత్రమేనని స్పష్టమవుతోంది.

ప్రస్తుతం గ్రేటర్ హైదరాబాద్ పరిధిలో మొత్తం ఓటర్ల సంఖ్య సుమారు 1.05 కోట్లుగా ఉందని అంచనా. ఇందులో హైదరాబాద్ జిల్లా పరిధిలోనే దాదాపు 47.37 లక్షల మంది ఓటర్లు ఉన్నారు. జులై చివరి నాటికి సేకరించిన ప్రాథమిక వివరాల ప్రకారం, హైదరాబాద్‌లో ఆబ్సెంట్, షిఫ్టెడ్, డెడ్ (ASD) కేటగిరీ కింద 4.21 లక్షల నుంచి 4.79 లక్షల మధ్య మాత్రమే అనర్హులైన ఓటర్లను గుర్తించారు. ఇది మొత్తం ఓట్లలో 10 శాతం కాగా, 20 లక్షల ఓట్లు తీసేశారనడం పూర్తిగా అసత్యం.

రాష్ట్రవ్యాప్తంగా పరిశీలిస్తే, తెలంగాణలో మొత్తం 3.38 కోట్ల మంది ఓటర్లు ఉన్నారు. చీఫ్ ఎలక్టోరల్ ఆఫీసర్ (CEO) సి. సుదర్శన్ రెడ్డి అందించిన వివరాల ప్రకారం, జులై 27 నాటికి రాష్ట్రంలో Absent, Shifted, Dead, Duplicate (ASDD) కేటగిరీలో దాదాపు 27.7 లక్షల మందిని గుర్తించారు. వీటిలో 1.38 లక్షల మంది అడ్రస్ దొరకనివారు (ఉన్-ట్రేసబుల్), 7.28 లక్షల మంది మరణించినవారు, 14.85 లక్షల మంది శాశ్వతంగా వలస వెళ్లినవారు కాగా, మరొక 4 లక్షల ఓట్లు డూప్లికేట్‌గా ఉన్నట్లు తేలింది.

Also Read : తెలంగాణ వ్యాప్తంగా భారీ వర్షాలు.. జలకళను సంతరించుకున్న జలాశయాలు

కేంద్ర ఎన్నికల సంఘం (ECI) నిబంధనల ప్రకారం.. 2002 నాటి ఓటర్ల జాబితాతో సరిపోల్చి, తేడాలు ఉన్నవారికి ముందుగా నోటీసులు జారీ చేస్తున్నారు. ఆ వివరణలను పరిశీలించిన తర్వాతే చట్టబద్ధంగా అనర్హులైన ఓట్లను తొలగిస్తారని, ఏ ఒక్క అర్హుడైన నిజమైన ఓటరు ఓటును తొలగించబోమని సీఈఓ స్పష్టం చేశారు. కేవలం మరణించిన, వలస వెళ్లిన, డూప్లికేట్ ఓట్లను మాత్రమే తొలగిస్తామని హామీ ఇచ్చారు.

హైదరాబాద్ నగరంలో ఉపాధి, వ్యాపారాల నిమిత్తం వచ్చిన వలసదారులు అధికంగా ఉండటం వల్ల ఇక్కడ చిరునామాల మార్పులు, మల్టిపుల్ రిజిస్ట్రేషన్లు ఎక్కువగా జరుగుతుంటాయి. చాలామంది తమ స్వగ్రామాల్లో ఓటు హక్కు ఉంచుకుంటూనే, హైదరాబాద్‌లోనూ మరో ఓటు కలిగి ఉంటున్నారు. ఇటువంటి అదనపు లేదా డూప్లికేట్ ఓట్లను గుర్తించి జాబితాను ప్రక్షాళన చేయడమే ECI ప్రధాన లక్ష్యం.

ఇంటింటి ఎన్యూమరేషన్ గడువు జూన్ 25 నుండి జులై 24 వరకు ఉండగా, ప్రభుత్వం దానిని ఆగస్టు 3 వరకు పొడిగించింది. ప్రస్తుతం బూత్ లెవల్ అధికారులు (BLOs) ఇళ్లకు వచ్చి ఫారాలు పూర్తి చేస్తున్నారు. సేకరించిన సమాచారాన్ని డిజిటైజ్ చేసే ప్రక్రియ వేగంగా జరుగుతోంది. రాష్ట్రవ్యాప్తంగా డిజిటైజేషన్ 75 శాతం దాటగా, హైదరాబాద్‌లో మాత్రం 54 శాతంతో నెమ్మదిగా సాగుతుండటం అధికారులను ఆందోళనకు గురిచేస్తోంది.

ఈ ప్రక్రియ పూర్తయిన తర్వాత ఆగస్టు 10వ తేదీ నాటికి ఎన్నికల సంఘం ‘డ్రాఫ్ట్ ఓటర్ల జాబితా’ను ప్రచురిస్తుంది. ఈ జాబితాపై ఓటర్లకు ఏవైనా మార్పులు లేదా అభ్యంతరాలు ఉంటే ఆగస్టు 30 వరకు ఫిర్యాదు చేయవచ్చు. కొత్త ఓటు నమోదు కోసం ఫారం-6, అడ్రస్ లేదా వివరాల మార్పుల కోసం ఫారం-8 ద్వారా అప్లై చేసుకోవడానికి అవకాశం కల్పిస్తారు. అభ్యంతరాలన్నింటినీ పరిశీలించిన అనంతరం అక్టోబర్ 1న తుది ఓటర్ల జాబితాను విడుదల చేస్తారు.

ఇంతవరకు ఎన్యూమరేషన్ ఫారమ్ సమర్పించని ఓటర్లు వెంటనే తమ పరిధిలోని BLO ని సంప్రదించడం శ్రేయస్కరం. లేదా స్వయంగా voters.eci.gov.in వెబ్‌సైట్ ద్వారా ఆన్‌లైన్‌లో తమ వివరాలను సమర్పించవచ్చు. ఏవైనా సందేహాలు ఉంటే 1950 ఉచిత హెల్ప్‌లైన్ నంబర్‌కు కాల్ చేసి సమాచారం పొందవచ్చు.

సోషల్ మీడియాలో వచ్చే అనధికారిక, ఫేక్ వార్తలను నమ్మి ప్రజలు ఆందోళన చెందవద్దని అధికారులు కోరుతున్నారు. ఓటర్ల జాబితాను స్వచ్ఛంగా, పారదర్శకంగా మార్చడమే ఈ SIR ప్రక్రియ ముఖ్య ఉద్దేశమని, ప్రతి చట్టబద్ధమైన ఓటరు హక్కును పరిరక్షిస్తామని కేంద్ర ఎన్నికల కమిషన్ హామీ ఇచ్చింది.

Also Read : ట్రైనీ ఐపీఎస్‌ ఉదయ్‌కృష్ణారెడ్డి అరెస్ట్‌?