Nepal :  నేపాల్‌లో వచ్చిన భారీ వరదల్లో ఓ టీచర్ తన తెలివితో 1,643 మంది పిల్లలను కాపాడారు. ప్రమాదం గురించి సమాచారం అందిన వెంటనే ఏమాత్రం ఆలస్యం చేయకుండా తీసుకున్న నిర్ణయం వల్ల వందలాది మంది చిన్నారులు ప్రాణాలతో బయటపడ్డారు. బుధవారం ఉదయం 9.20 గంటలకు త్రిశూలి లోయలోని త్రిభువన్ త్రిశూలి సెకండరీ స్కూల్ ప్రిన్సిపల్ రాజేంద్ర దవాడికి ఓ స్నేహితుడి నుంచి ఫోన్ వచ్చింది. గ్రామం మొత్తం పోయింది.. నది తీసుకెళ్లింది. నువ్వు వెంటనే పరుగెత్తు అని అతడు హెచ్చరించాడు. ఆ సమయంలో పాఠశాలలో, చుట్టుపక్కల కలిపి 1,643 మంది పిల్లలు ఉన్నారు.

హిమనదిలోని మంచు, రాళ్లు ఒక్కసారిగా కూలిపోవడంతో కొండ ప్రాంతాల్లోని నదుల్లో నీరు భారీగా పెరిగింది. రాళ్లు, మట్టి, మంచు, చెత్తతో కలిసి వచ్చిన వరద నీరు మార్గంలో ఉన్న భవనాలు, వంతెనలు, విద్యుత్ కేంద్రాలను కొట్టుకుపోయింది. ఈ ఘటనలో నేపాల్‌లో 734 మంది, టిబెట్‌లో 16 మంది ప్రాణాలు కోల్పోయారు. నేపాల్‌లో ఇంకా 2,498 మంది కనిపించకుండా పోయారు. టిబెట్‌లోని గ్యిరోంగ్ ప్రాంతంలో మరో 546 మంది ఆచూకీ తెలియడం లేదు.

47 ఏళ్ల రాజేంద్ర దవాడి ఆ సమయంలో ఇంగ్లిష్ టీచర్‌గా కూడా పనిచేస్తున్నారు. వరద నీరు వేగంగా పెరుగుతున్న సమయంలో పిల్లలందరి బాధ్యత ఆయనపైనే ఉంది. ప్రమాదం నుంచి పిల్లలను బయటకు తీసుకురావడానికి ఆయనకు కొన్ని నిమిషాలు మాత్రమే ఉన్నాయి. మొదట పాఠశాల సురక్షితంగానే ఉందని దవాడి భావించారు. కాంక్రీట్‌తో నిర్మించిన ఆ పాఠశాల నదికి దాదాపు 60 మీటర్ల ఎత్తులో ఉంది. గ్రామాన్ని తూర్పు వైపుకు కలిపే ఇనుప వంతెన కూడా పాఠశాల ఉన్న స్థాయిలోనే ఉంది.

అయితే కొద్దిసేపటికే ఓ విద్యార్థి తల్లిదండ్రులు పాఠశాలకు వచ్చి నీరు చాలా వేగంగా పెరుగుతోందని చెప్పారు. దీంతో దవాడికి పరిస్థితి తీవ్రంగా ఉందని అర్థమైంది. వెంటనే ఆయన స్కూల్ బెల్ కొట్టించారు. తరగతి గదుల్లో ఉన్న పిల్లలను బయటకు తీసుకురావాలని టీచర్లకు చెప్పారు. స్కూల్ బస్సు డ్రైవర్లకు కూడా ఫోన్ చేసి బస్సులను వెనక్కి తిప్పాలని సూచించారు. అయితే ఓ బస్సు డ్రైవర్‌ను మాత్రం ఆయన సంప్రదించలేకపోయారు. ఆ బస్సు అప్పటికే వంతెనపైకి వెళ్లడం ఆయన చూశారు.

అప్పటికే పిల్లలకు కూడా ప్రమాదం అర్థమైంది. ఓ బాలిక భయంతో తీవ్రంగా ఆందోళనకు గురైంది. ఆమెను మోటార్‌సైకిల్‌పై కొండపైకి తీసుకెళ్లారు. మిగతా పిల్లలు కాలినడకన సురక్షిత ప్రాంతం వైపు పరుగులు తీశారు. దవాడి కూడా వారి వెంటే వెళ్లారు. చివరికి పిల్లలంతా ఓ బోధి చెట్టు కిందకు చేరుకుని అక్కడ తలదాచుకున్నారు. కొద్దిసేపటికే వరద నీరు పాఠశాల వైపు దూసుకొచ్చి భవనాలను పూర్తిగా కొట్టుకుపోయింది.

దవాడి వెంటనే స్పందించడంతో 1,643 మంది పిల్లలు ప్రాణాలతో బయటపడ్డారు. పాఠశాల సిబ్బందిలో కూడా దాదాపు అందరూ సురక్షితంగా బయటపడ్డారు. అయితే ఇద్దరు సిబ్బంది మాత్రం ప్రాణాలు కోల్పోయారు. సోషల్ హిస్టరీ టీచర్ 32 ఏళ్ల సంతోష్ పరిహార్ తన అద్దె గదికి తిరిగి వెళ్లి ఉదయం అల్పాహారం వండుకుంటుండగా వరదలో కొట్టుకుపోయారు. పాఠశాల శానిటేషన్ సిబ్బంది సుల్తాన్ లామా కూడా తలుపులు మూసేందుకు తిరిగి వెళ్లడంతో వరదలో ప్రాణాలు కోల్పోయారు. పిల్లల ప్రాణాలు కాపాడిన దవాడిని స్థానికులు హీరోగా కొనియాడుతున్నారు. అయితే ఆయన మాత్రం తనను తాను హీరోగా భావించడం లేదు. నేను ఇంకేం చేయగలను? అంటూ పాఠశాల ఉన్న చోట ఇప్పుడు మిగిలిన బురద, శిథిలాలను చూస్తూ ఆయన అన్నారు.