Hormuz : హోర్ముజ్ జలసంధిలో యునైటెడ్ అరబ్ ఎమిరేట్స్ కు చెందిన రెండు ట్యాంకర్లపై ఇరాన్ దాడి చేయడంతో పరిస్థితి తీవ్ర ఉద్రిక్తంగా మారింది. ఇరాన్ జరిపిన ఈ క్రూయిజ్ క్షిపణి దాడుల్లో ఒక భారతీయ సిబ్బంది మరణించగా, మరో ఎనిమిది మంది తీవ్రంగా గాయపడ్డారు. గాయపడిన వారిలో ఆరుగురు భారతీయులు, ఇద్దరు ఉక్రెయిన్ దేశస్తులు ఉన్నారు. వీరిలో నలుగురి పరిస్థితి విషమంగా ఉన్నట్లు సమాచారం. ఒమన్ జలాల్లోని వ్యూహాత్మక షిప్పింగ్ మార్గంలో వెళ్తున్న మొంబాసా. అల్ బహియా అనే ట్యాంకర్లపై ఈ దాడులు జరిగాయి.
ఈ దాడులను యూఏఈ రక్షణ శాఖ తీవ్రంగా ఖండించింది. ఇది అంతర్జాతీయ చట్టాలను ఉల్లంఘించడమేనని, ప్రాంతీయ భద్రతకు పెద్ద ముప్పు అని ఆ దేశం పేర్కొంది. తమ భూభాగాన్ని, పౌరులను కాపాడుకునేందుకు, అలాగే తమ దేశ సార్వభౌమాధికారాన్ని రక్షించుకునేందుకు ఎటువంటి చర్యలకైనా తాము సిద్ధమని యూఏఈ స్పష్టం చేసింది. తమ దేశ భద్రతను దెబ్బతీసే ఏ ప్రయత్నానికైనా గట్టిగా సమాధానం ఇచ్చేందుకు తాము అత్యంత అప్రమత్తంగా ఉన్నామని యూఏఈ రక్షణ శాఖ వెల్లడించింది.
Also Read : ట్రంప్ సంచలనం : నౌకలపై 20% టోల్ బాదుడు.. ఇరాన్ ఫైర్!
హోర్ముజ్ జలసంధిపై పట్టు కోసం
ఇరాన్, అమెరికా దేశాల మధ్య హోర్ముజ్ జలసంధిపై పట్టు కోసం సాగుతున్న పోరులో భాగంగానే ఈ తాజా దాడులు చోటుచేసుకున్నాయి. ఈ జలసంధి ప్రపంచ చమురు, సహజ వాయువు సరఫరాలో అత్యంత కీలకమైనది. ఈ పరిణామాల నేపథ్యంలో అంతర్జాతీయ మార్కెట్లో బ్రెంట్ క్రూడ్ ఆయిల్ ధర 7.8 శాతం పెరిగి 81.92 డాలర్లకు చేరుకుంది. యుద్ధ సమయంలో ఇది 120 డాలర్ల వరకు చేరినప్పటికీ, ప్రస్తుత పెరుగుదల ప్రపంచవ్యాప్తంగా ధరలు పెరిగే అవకాశం ఉందని నిపుణులు హెచ్చరిస్తున్నారు.
ఇరాన్పై అమెరికా సైన్యం మరోసారి వరుస దాడులను మొదలుపెట్టింది. ఇరాన్ బలగాలు అమాయక పౌరులపై, వాణిజ్య నౌకలపై దాడులు చేయకుండా వారి సామర్థ్యాన్ని దెబ్బతీయడమే లక్ష్యంగా ఈ దాడులు కొనసాగుతాయని అమెరికా సెంట్రల్ కమాండ్ పేర్కొంది. ఈ ఆపరేషన్ ఒక భారీ దాడి అని అమెరికా అధ్యక్షుడు ట్రంప్ వ్యాఖ్యానించారు. తాము ఇరాన్పై చాలా గట్టిగా దాడులు చేస్తున్నామని, వారి దాడులను తిప్పికొడుతూ జలసంధిని నియంత్రిస్తున్నామని, తిరిగి దిగ్బంధనాన్ని (బ్లాకేడ్) ఏర్పాటు చేస్తున్నామని ఆయన చెప్పారు.
ఈ ప్రాంతానికి తాము రక్షణ కల్పిస్తున్నామని, ఇందుకు గాను ఖర్చు అవుతోందని ట్రంప్ అన్నారు. తాము రక్షణ కల్పిస్తున్నందుకు గాను నౌకల నుండి రుసుము వసూలు చేస్తామని ఆయన స్పష్టం చేశారు. గతంలో వసూలు చేయబోమని చెప్పినప్పటికీ, ఇప్పుడు తమ నిర్ణయాన్ని మార్చుకున్నట్లు ఆయన వెల్లడించారు. ఈ పరిణామాలు అంతర్జాతీయంగా తీవ్ర చర్చనీయాంశంగా మారాయి.
Also Read : ట్రంప్ సన్నిహితుడి డెత్ మిస్టరీ: లిండ్సే గ్రాహం మరణం వెనుక అసలు కుట్ర ఏంటి?
