Donald Trump : అమెరికా ఎన్నికల డేటాను చైనా తారుమారు చేసిందని, ఎన్నికల వ్యవస్థలో భారీ లోపాలు ఉన్నాయని అమెరికా అధ్యక్షుడు డొనాల్డ్ ట్రంప్ సంచలన ఆరోపణలు చేశారు. సుమారు 25 నిమిషాల పాటు దేశ ప్రజలను ఉద్దేశించి చేసిన ప్రసంగంలో ఆయన ఈ వ్యాఖ్యలు చేశారు. 2020 ఎన్నికల సమయంలో చైనా చరిత్రలో ఎన్నడూ లేని విధంగా అత్యంత పెద్ద స్థాయిలో డేటా హ్యాకింగ్కు పాల్పడిందని, 22 కోట్ల మంది అమెరికన్ ఓటర్ల వివరాలను అక్రమంగా సేకరించిందని ట్రంప్ పేర్కొన్నారు. ఈ విషయానికి సంబంధించిన ఆధారాలను త్వరలో బయటపెడతామని ఆయన తెలిపారు.
ఎన్నికల వ్యవస్థపై ట్రంప్ చేసిన ఈ వ్యాఖ్యలు రాజకీయంగా చర్చనీయాంశమయ్యాయి. 2020 ఎన్నికల్లో తాను ఓడిపోవడానికి ఈ భారీ మోసాలే కారణమని ఆయన పునరుద్ఘాటించారు. అయితే, తన వాదనలను బలంగా వినిపిస్తున్నప్పటికీ, 2020 ఎన్నికల్లో ఓట్లు మార్చబడ్డాయని లేదా ఫలితాలను తారుమారు చేశారని నిరూపించే ఎలాంటి పక్కా ఆధారాలను ఆయన చూపలేదు. అమెరికా ఎన్నికల వ్యవస్థ వైఫల్యం చెందిందని, ప్రజలు తమ ఓటు సక్రమంగా లెక్కించబడుతుందని నమ్మే పరిస్థితి లేదని ఆయన విమర్శించారు.
Also Read : ఆ జలసంధి క్లోజ్.. ఆకాశాన్ని తాకనున్న పెట్రోల్ ధరలు.. పాకిస్థాన్కు బిగ్ షాక్!
ట్రంప్ ఆరోపణలను చైనా తీవ్రంగా ఖండించింది. అమెరికా ఎన్నికలు ఆ దేశ అంతర్గత విషయమని, ఇతర దేశాల వ్యవహారాల్లో జోక్యం చేసుకోకూడదనేది తమ విధానమని చైనా స్పష్టం చేసింది. అమెరికా ఎన్నికల్లో తాము ఎప్పుడూ జోక్యం చేసుకోలేదని, భవిష్యత్తులో కూడా చేసుకోమని చైనీస్ ఎంబసీ ప్రతినిధి లీయు చాంగ్ తెలిపారు. కాగా, ఈ ఆరోపణలు కొత్తవేమీ కావని, 2020లోనే చైనా ఓటర్ల డేటాను విశ్లేషించిందని నిఘా నివేదికలు పేర్కొన్నాయని విశ్లేషకులు గుర్తు చేస్తున్నారు.
రాబోయే మధ్యంతర ఎన్నికల నేపథ్యంలో, ట్రంప్ సేవ్ అమెరికా యాక్ట్ ను ఆమోదించాలని డిమాండ్ చేశారు. ఓటింగ్ విధానంలో సమూల మార్పులు చేయాలని, ముఖ్యంగా మెయిల్-ఇన్ బ్యాలెట్ పద్ధతిని పూర్తిగా నిషేధించాలని ఆయన కోరారు. తన ప్రసంగాన్ని ప్రత్యక్ష ప్రసారం చేయని టీవీ ఛానళ్లపై కూడా ఆయన ఆగ్రహం వ్యక్తం చేశారు. ఆయా ఛానళ్ల బ్రాడ్కాస్టింగ్ లైసెన్స్లను రద్దు చేయాలని డిమాండ్ చేశారు. ట్రంప్ తన రాజకీయ మద్దతును పుంజుకునే క్రమంలోనే ఈ వ్యాఖ్యలు చేస్తున్నారని, ఎన్నికల వ్యవస్థపై అపనమ్మకం కలిగిస్తున్నారని విపక్షాలు విమర్శిస్తున్నాయి. గతంలో కూడా ఆయన ఇలాంటి ఆరోపణలు చేసినప్పటికీ, ఎక్కడా ఎన్నికల ఫలితాలను ప్రభావితం చేసే స్థాయిలో మోసం జరిగినట్లు రుజువు కాలేదు.
Also Read : ట్రంప్ను చంపితే 10 మిలియన్ డాలర్లు… సంచలన ప్రకటన!
