Napel Fish: నేపాల్లో వచ్చిన భారీ వరదలతో బిహార్లోకి పెద్ద పెద్ద చేపలు కొట్టుకొచ్చాయి. వాటిలో కొన్ని చేపలు 90 నుంచి 100 కిలోల వరకు ఉన్నాయని స్థానికులు చెబుతున్నారు. నేపాల్లో వచ్చిన భారీ వరదలతో బిహార్లోకి పెద్ద పెద్ద చేపలు కొట్టుకొచ్చాయి. వాటిలో కొన్ని చేపలు 90 నుంచి 100 కిలోల వరకు ఉన్నాయని స్థానికులు చెబుతున్నారు. దీంతో ఈ చేపల గురించి సోషల్ మీడియాలో పెద్ద చర్చ జరుగుతోంది. అయితే ఈ చేపలను పట్టుకోవద్దని, కొనొద్దని, తినొద్దని బీహార్ ప్రభుత్వం ప్రజలను హెచ్చరించింది. ఇంతకు ఈ చేప పేరు ఏంటంటే.. ఈ చేప పేరు గూంచ్. దీన్నే కొన్ని ప్రాంతాల్లో గోయితా, బాఘడ్ అని కూడా పిలుస్తారు. దీని శాస్త్రీయ పేరు బాగేరియస్ యారెల్లీ.
ఇది పెద్ద చేపలను, కప్పలను, పీతలను, రొయ్యలను, నీటిలో ఉండే ఇతర చిన్న జీవులను తింటుంది. ఈ చేపలు దాదాపు రెండు మీటర్ల పొడవు వరకు పెరగవచ్చు. 70–80 కిలోల బరువు ఉండటం సాధారణమే. కొన్ని ఇంకా ఎక్కువ బరువు కూడా ఉండొచ్చు. చూడటానికి కూడా ఈ చేప కాస్త భయంకరంగానే ఉంటుంది. దీని తల వెడల్పుగా ఉంటుంది. నోరు పెద్దగా ఉండటంతో పాటు పదునైన పళ్లు ఉంటాయి. నోటి దగ్గర నాలుగు జతల మీసాలు ఉంటాయి. శరీరంపై గోధుమ, పసుపు, ఆకుపచ్చ రంగుల్లో మచ్చలు ఉంటాయి. దీంతో నది అడుగున రాళ్ల మధ్య సులభంగా దాక్కుని.. ఒక్కసారిగా తన ఆహారంపై దాడి చేస్తుంది.
గూంచ్ చేపలు సాధారణంగా హిమాలయ ప్రాంతాల్లోని లోతైన, వేగంగా ప్రవహించే నదుల్లో ఉంటాయి. నది అడుగున ఉండే ఈ చేపలు బలమైన నీటి ప్రవాహాన్ని తట్టుకోగలవు. అయితే నేపాల్లో ఒక్కసారిగా భారీ వరదలు రావడంతో నీటి ప్రవాహం చాలా పెరిగింది. దీంతో నది అడుగున ఉన్న కొన్ని చేపలు కూడా నీటితో పాటు కొట్టుకువచ్చాయి. అలా నేపాల్ నుంచి త్రిశూలి, నారాయణి నదుల మీదుగా ఈ చేపలు బిహార్లోని గండక్ నదిలోకి వచ్చాయని చెబుతున్నారు. బిహార్లోని గోపాల్గంజ్, బగహా, వాల్మీకినగర్ ప్రాంతాల్లో మత్స్యకారులకు ఇలాంటి పెద్ద చేపలు కనిపించాయి. కొన్ని 15 కిలోలు, కొన్ని 27 కిలోలు, మరికొన్ని 40 నుంచి 45 కిలోల వరకు ఉన్నాయని చెబుతున్నారు.
వరద నీటితో వచ్చిన చేపలు ఎక్కడి నుంచి వచ్చాయో, వాటిలో ఏముందో తెలియదు. వరద నీటిలో బురద, చెత్తతో పాటు చనిపోయిన జంతువులు కూడా ఉండొచ్చు. అందుకే ఈ చేపల వల్ల అనారోగ్యం వచ్చే అవకాశం ఉందని అధికారులు భయపడుతున్నారు. కొన్ని ప్రాంతాల్లో ఈ చేపలను తిన్న తర్వాత కొందరికి వాంతులు, విరేచనాలు, కడుపు నొప్పి వచ్చినట్లు వార్తలు వచ్చాయి. అందుకే నీరు, పరిస్థితులు పూర్తిగా సరిగా అయ్యే వరకు ఇలాంటి చేపలను తినొద్దని అధికారులు చెబుతున్నారు. అయితే ఒక విషయం గుర్తుంచుకోవాలి. గూంచ్ చేప సహజంగా విషపూరితమైన చేప కాదు అని నిపుణులు చెబుతున్నారు. కానీ వరద నీటిలో ఉండటం, చెత్తను లేదా చనిపోయిన జంతువులను తినడం వల్ల ఈ చేపల్లో హానికరమైన సూక్ష్మజీవులు ఉండే అవకాశం ఉంది.
నేపాల్లో వచ్చిన భారీ వరదల కారణంగా గూంచ్ చేపలు బిహార్లోకి కొట్టుకొచ్చాయి. కొన్ని చాలా పెద్దగా ఉండటంతో ప్రజల్లో ఆసక్తి పెరిగింది. ఇది భయంకరంగా కనిపించే పెద్ద చేప అయినప్పటికీ.. మనుషులను కావాలనే వేటాడే చేప అని చెప్పడానికి ఆధారాలు లేవు. అయితే వరద నీటితో వచ్చిన చేపలు కావడంతో వాటిని తినడం మాత్రం మంచిది కాదని అధికారులు హెచ్చరిస్తున్నారు. అందుకే ప్రభుత్వం స్పష్టంగా చెబుతున్నది ఒక్కటే.. వరద నీటితో వచ్చిన తెలియని చేపలను పట్టొద్దు.. కొనొద్దు.. తినొద్దు.
