US-IRAN War : అమెరికా, ఇరాన్‌ మధ్య కొన్ని వారాలుగా సద్దుమణిగినట్లు కనిపించిన యుద్ధ పరిస్థితులు మరోసారి తీవ్ర రూపం దాల్చే అవకాశముందా? మధ్యప్రాచ్యంలోని పలు ప్రభుత్వాలు హింస మరింత పెరిగే అవకాశం ఉందన్న ఆందోళనతో ముందస్తు చర్యలు చేపడుతున్నాయి.అమెరికా ఇరాన్‌పై మళ్లీ బాంబు దాడులకు సిద్ధమవుతోందని తమకు నిఘా సమాచారం అందిందని ఇరాన్‌ చెబుతోంది. ఇరాన్‌ వ్యక్తం చేస్తున్న ఈ ఆందోళనకు కొన్ని పరిణామాలు కూడా కారణంగా కనిపిస్తున్నాయి. అమెరికా మరోసారి పెద్ద స్థాయిలో సన్నద్ధమవుతోందన్న సంకేతాలు వెలువడుతున్నాయి.

Also Read : యూఎస్‌–ఇజ్రాయెల్ ఇరాన్‌పై భారీ దాడికి సిద్ధమవుతున్నాయా?

అమెరికా భారీ సన్నద్ధతలో ఉందా?

ఈ వారం న్యూయార్క్‌లో జరగనున్న ఐక్యరాజ్యసమితి జనరల్‌ అసెంబ్లీ సమావేశాలకు ముందు ఉద్రిక్తతలు పెరుగుతున్న సంకేతాలు కనిపిస్తున్నాయి. అమెరికా అధ్యక్షుడు డొనాల్డ్‌ ట్రంప్‌ కూడా వరుస చర్యలతో చురుగ్గా వ్యవహరిస్తున్నారు. ట్రంప్‌ ఆదివారం క్యాంప్‌ డేవిడ్‌ ప్రెసిడెన్షియల్‌ రిట్రీట్‌కు వెళ్లిన వారాంతపు పర్యటనను మధ్యలోనే ముగించారు. దీనికి అధికారిక కారణాన్ని వెల్లడించలేదు. అదే సమయంలో అమెరికా విదేశాంగ శాఖ మధ్యప్రాచ్యంలో ఉన్న అమెరికా పౌరులందరికీ కొత్త భద్రతా హెచ్చరికను జారీ చేసింది.

అమెరికా తన వద్ద ఉన్న అన్ని అవకాశాలను తెరిచి ఉంచిందని ట్రంప్‌ స్పష్టంగా చెబుతున్నారు. ఫాక్స్‌ న్యూస్‌ విలేకరితో మాట్లాడుతూ, “చాలా త్వరలో చాలా పెద్ద విషయాలు జరగబోతున్నాయి” అని ఆయన అన్నారు.తాము పరిశీలిస్తున్న అవకాశాల్లో “ఇరాన్‌ను పూర్తిగా నాశనం చేయడం, ఆ దేశాన్ని ఆర్థికంగా కుప్పకూలేలా చేయడం లేదా ఏదైనా ఒప్పందానికి రావడం” ఉన్నాయని ట్రంప్‌ పేర్కొన్నారు.

ఈ నేపథ్యంలో ఇరాన్‌కు చెందిన ఇస్లామిక్‌ రివల్యూషనరీ గార్డ్‌ కార్ప్స్‌ (IRGC) కూడా హెచ్చరిక జారీ చేసింది. అమెరికా దాడికి దిగితే, మధ్యప్రాచ్యంలో ఉన్న అమెరికా స్థావరాలు, అమెరికా ప్రయోజనాలపై ఎలాంటి మినహాయింపులు లేకుండా నిరంతర, ప్రభావవంతమైన, తీవ్ర దాడులు చేస్తామని హెచ్చరించింది.

అమెరికా ఇరాన్‌తో సాగిస్తున్న యుద్ధానికి సంబంధించి కొత్త ప్రయాణ హెచ్చరికను జారీ చేసింది. ఎలాంటి కారణంతోనూ అమెరికా పౌరులు ఇరాన్‌కు వెళ్లవద్దని సూచించింది. ఇప్పటికే ఇరాన్‌లో ఉన్న అమెరికన్లు వెంటనే ఆ దేశాన్ని విడిచిపెట్టాలని కూడా కోరింది.ఈ ప్రాంతంలో భద్రతా పరిస్థితులు మరింత దిగజారే అవకాశం ఉందని హెచ్చరించింది. ఇరాన్‌లోని అమెరికా వర్చువల్‌ ఎంబసీ జారీ చేసిన భద్రతా హెచ్చరికలో, ఇరాన్‌ ప్రాంతంలో భద్రతా పరిస్థితులు సంక్లిష్టంగా ఉన్నాయని పేర్కొంది. విమానాలు రద్దు కావడం, గగనతలం మూసివేయడం, ప్రయాణానికి సంబంధించిన ఇతర అంతరాయాలు ఏర్పడే అవకాశం ఉందని కూడా హెచ్చరించింది.

అమెరికా పౌరులు ఎట్టి పరిస్థితుల్లోనూ ఇరాన్‌కు వెళ్లవద్దని, ప్రస్తుతం ఇరాన్‌లో ఉన్నవారు దేశాన్ని విడిచిపెట్టాలని సూచించింది. అలాగే మధ్యప్రాచ్యంలో ఉన్న అమెరికన్లు మరింత అప్రమత్తంగా ఉండాలని, విమానాశ్రయాలు, విమానయాన సంస్థలు, సరిహద్దు చెక్‌పోస్టుల్లో పరిస్థితులను నిశితంగా గమనించాలని అమెరికా మిషన్‌ సూచించింది. ఇరాన్‌ భూసరిహద్దుల వద్ద రాకపోకలకు సంబంధించిన నిబంధనలు ముందస్తు సమాచారం లేకుండానే మారే అవకాశం ఉందని కూడా హెచ్చరించింది. తాము వెళ్లాలనుకుంటున్న దేశాల్లో ప్రవేశానికి సంబంధించిన నిబంధనలను ముందుగానే తెలుసుకోవాలని అమెరికా ప్రయాణికులకు సూచించింది.అంతేకాకుండా, వైమానిక దాడులు జరిగే పరిస్థితుల్లో కిటికీలు, గాజు తలుపులకు దూరంగా ఉండాలని, కూలిపోయే శిథిలాల నుంచి రక్షణ పొందాలని, అధికారిక సమాచారాన్ని నిరంతరం గమనించాలని సూచించింది.

Also Read : హామీలు నెరవేర్చే వరకు హర్మూజ్ బంద్.. ఇరాన్ స్పష్టీకరణ

సౌదీ అరేబియాలోనూ భద్రతా ఆంక్షలు

ఇరాన్‌కు సంబంధించిన ఈ కొత్త హెచ్చరికకు ముందు సౌదీ అరేబియాలో అమెరికన్లు, అమెరికా ప్రభుత్వ ఉద్యోగుల కోసం మరో భద్రతా హెచ్చరిక జారీ అయింది.సౌదీ అరేబియాలోని అమెరికా మిషన్‌ ఇటీవల ప్రభుత్వ ఉద్యోగులు తైఫ్‌, యన్బు ప్రాంతాలకు అధికారికంగా లేదా వ్యక్తిగతంగా ప్రయాణించాలంటే ప్రత్యేక అనుమతి తీసుకోవాలని ఆదేశించింది. హూతీ తిరుగుబాటుదారుల దాడుల నేపథ్యంలో భద్రతపై ఆందోళనలు పెరగడంతో ఈ చర్యలు తీసుకున్నట్లు తెలుస్తోంది. అమెరికా హూతీలను ఇరాన్‌ మద్దతు ఇస్తున్న ప్రాక్సీ సంస్థగా పరిగణిస్తోంది.

అమెరికా ఇచ్చిన ఐదు సిగ్నల్స్‌ ఇవే…

ట్రంప్‌ క్యాంప్‌ డేవిడ్‌ వారాంతపు పర్యటనను మధ్యలోనే ముగించడం.
అమెరికా మధ్యప్రాచ్యంలో కొత్త భద్రతా హెచ్చరిక జారీ చేయడం.
“చాలా త్వరలో చాలా పెద్ద విషయాలు జరగబోతున్నాయి” అని ట్రంప్‌ చెప్పడం.
ఇరాన్‌కు సంబంధించి అమెరికా కొత్త ప్రయాణ హెచ్చరిక జారీ చేయడం.
సౌదీ అరేబియాలో అమెరికా ప్రభుత్వ ఉద్యోగులపై భద్రతా ఆంక్షలను మరింత పెంచడం.