Donald Trump : ఐక్యరాజ్యసమితి సాధారణ సభ (UNGA) 81వ సమావేశం అమెరికాలో జరుగుతోంది. ఈ సమావేశంలో పలుదేశాల అధ్యక్షులు, ప్రతినిధులు పాల్గొంటున్నారు. ఈ సందర్భంగా అమెరికా అధ్యక్షుడు డొనాల్డ్ ట్రంప్ సమావేశంలో ప్రసంగిస్తూ పలు అంశాలను ప్రస్తావించారు.ఈ సందర్భంగా ఇరాన్ నుంచి డెన్మార్క్‌కు చెందిన గ్రీన్‌లాండ్ వరకు అనేక విషయాలపై మాట్లాడారు.ఆయన ప్రసంగంలోని 10 ముఖ్యాంశాలు ఇవి.
అమెరికా అధ్యక్షుడు డొనాల్డ్ ట్రంప్ మరోసారి భారత్-పాకిస్థాన్ ఘర్షణ (ఆపరేషన్ సిందూర్) సహా ప్రపంచంలోని 8 యుద్ధాలను టారిఫ్‌లు విధించడం ద్వారా ఆపించానని పేర్కొంటూ, ఐక్యరాజ్యసమితి సాధారణ సభ 81వ సమావేశంలో తన ప్రసంగాన్ని ముగించారు. ఈ సందర్భంగా ఇరాన్‌కు సంబంధించి కూడా ఆయన పలు వ్యాఖ్యలు చేశారు. మంగళవారం ఆయన చేసిన ప్రసంగంలోని 10 ముఖ్య అంశాలను పరిశీలిద్దాం.
Also Read : శత్రువుల గోడను బద్దలు కొట్టిన పుతిన్.. పార్లమెంట్‌లో 355 సీట్లు.. కోలుకోని ట్రంప్!
ప్రపంచవ్యాప్తంగా 8 యుద్ధాలను ఆపించాను.. ట్రంప్
ఇరాన్‌పై దాడి చేసిన అమెరికా అధ్యక్షుడు డొనాల్డ్ ట్రంప్ తన ప్రసంగంలో టారిఫ్‌లు విధించడం ద్వారా 8 దేశాల్లో యుద్ధాలను ఆపించానని పేర్కొన్నారు. ఇందులో భారత్-పాకిస్థాన్ ఘర్షణ, గాజా సంఘర్షణ, అర్మేనియా-అజర్‌బైజాన్ మధ్య ఘర్షణలు ఉన్నాయని తెలిపారు. ఈ సందర్భంగా పాకిస్థాన్ ప్రధానిని ఆయన ‘అద్భుతమైన వ్యక్తి’గా అభివర్ణించారు. ఈ ఘర్షణను ఆపించడంలో తానే కీలక పాత్ర పోషించానని ట్రంప్ గతంలో కూడా పలుమార్లు చెప్పుకున్నారు. అయితే భారత్ మాత్రం ఎలాంటి మూడో దేశం మధ్యవర్తిత్వాన్ని ఎప్పటినుంచో తిరస్కరిస్తూ వస్తోంది.
‘ఒప్పందం చేసుకోండి లేదా అంతం చేస్తాం’… ఇరాన్‌కు నేరుగా హెచ్చరిక
ట్రంప్ ప్రసంగంలోని అత్యంత కీలక అంశాల్లో ఒకటి ఇరాన్‌కు ఆయన చేసిన హెచ్చరిక. తన ముందు ఒక పెద్ద నిర్ణయం ఉందని ట్రంప్ అన్నారు. ఇరాన్‌తో ఒప్పందం చేసుకోవాలా, లేక దాన్ని అంతం చేయాలా అనే నిర్ణయం తీసుకోవాల్సి ఉందని పేర్కొన్నారు. మళ్లీ ఎలాంటి నష్టం జరగకుండా అడ్డుకోవాలంటే ఈ నిర్ణయాన్ని త్వరగా తీసుకోవాల్సి ఉందని ఆయన అన్నారు.
ఇరాన్‌ను ఆర్థికంగా ఒంటరిగా చేయాలి..ఐక్యరాజ్యసమితికి విజ్ఞప్తి
ఇరాన్‌ను హెచ్చరించడంతో పాటు, దాన్ని ఆర్థికంగా ఒంటరిగా చేయాలని ట్రంప్ ఐక్యరాజ్యసమితిని కోరారు. ఈ వ్యూహం పనిచేస్తే చమురు ధరలు గణనీయంగా తగ్గే అవకాశం ఉందని ఆయన అన్నారు.ఐక్యరాజ్యసమితి సభ్య దేశాలతో పాటు అన్ని దేశాలు ఇరాన్‌ను ఆర్థికంగా బహిష్కరించి, దానిపై ఆర్థిక ఒత్తిడి పెంచాలని ట్రంప్ విజ్ఞప్తి చేశారు.
గెలిచినవారికే అన్నీ దక్కుతాయి..వెనిజులాలో చర్యపై సమర్థన
వెనిజులాలో అమెరికా చేపట్టిన చర్యలను డొనాల్డ్ ట్రంప్ సమర్థించారు. ఈ చర్యను ప్రశంసిస్తూ, ‘గెలిచినవారికే అన్నీ దక్కుతాయి’ అని అన్నారు. విషయం ఏంటంటే.. అమెరికా వెనిజులాపై దాడి చేసి అక్కడ ప్రభుత్వాన్ని కూల్చివేసింది. అప్పటి అధ్యక్షుడు నికోలస్ మదురోను అరెస్టు చేసి జైలులో పెట్టింది. అప్పటి నుంచి అమెరికా పరోక్షంగా వెనిజులా పాలనను నిర్వహిస్తోంది.
పొరుగు దేశాలు వామపక్షానికి కేంద్రాలుగా మారకూడదు
అమెరికా అధ్యక్షుడు డొనాల్డ్ ట్రంప్ చేసిన ముఖ్య వ్యాఖ్యల్లో క్యూబా ప్రస్తావన కూడా ఉంది. అమెరికా ఖండం నుంచి వామపక్ష భావజాలాన్ని తొలగించాల్సిన అవసరం ఉందని ఆయన అన్నారు.అమెరికాలో కమ్యూనిజం లేదా వామపక్ష భావజాలానికి ఎప్పటికీ చోటు ఉండదని ట్రంప్ పేర్కొన్నారు. అమెరికా పొరుగు దేశాలను కూడా వామపక్షానికి కేంద్రాలుగా మారనివ్వదని, ముఖ్యంగా వాషింగ్టన్‌కు ముప్పుగా మారే దేశాల విషయంలో దీనిని అనుమతించబోమని అన్నారు.క్యూబాలో ప్రభుత్వాన్ని కూల్చివేయడం గురించి కూడా ఆయన ఐక్యరాజ్యసమితి వేదికపై మాట్లాడారు. దీంతో క్యూబా ప్రతినిధి బృందం ట్రంప్ ప్రసంగం మధ్యలోనే బయటకు వెళ్లిపోయింది.
గ్రీన్‌లాండ్‌పై అమెరికా-డెన్మార్క్ మధ్య ఒప్పందం
డొనాల్డ్ ట్రంప్ తన ప్రసంగంలో గ్రీన్‌లాండ్‌ను కూడా ప్రస్తావించారు. గ్రీన్‌లాండ్‌ను స్వాధీనం చేసుకోవాలనే ఉద్దేశాన్ని ట్రంప్ గతంలో పలుమార్లు వ్యక్తం చేశారు. అందువల్ల ఐక్యరాజ్యసమితి వేదికపై ఆయన చేసిన ఈ ప్రస్తావన ప్రాధాన్యం సంతరించుకుంది.గ్రీన్‌లాండ్‌లో అమెరికా భారీ స్థాయిలో సైన్యాన్ని మోహరిస్తుందని ట్రంప్ అన్నారు. త్వరలో అక్కడ రెండు భారీ సైనిక స్థావరాల నిర్మాణ ప్రక్రియ కొనసాగుతుందని వెల్లడించారు.
Also Read : మలేషియాకు వెళ్లే ఇండియన్స్ కు కేంద్రం కీలక హెచ్చరిక!
ఆర్టిఫిషియల్ ఇంటెలిజెన్స్‌కు కొత్త పేరు
డొనాల్డ్ ట్రంప్ ఐక్యరాజ్యసమితి వేదికపై ఒకవైపు అమెరికా సాంకేతిక శక్తిని కొనియాడుతూనే, ఆర్టిఫిషియల్ ఇంటెలిజెన్స్‌కు కొత్త పేరు పెట్టారు. ఏఐపై హెచ్చరికలు చేస్తున్న వారు గతంలో తనకు వ్యతిరేకంగా వచ్చిన ‘రష్యా కుట్ర’ ఆరోపణలకు మద్దతు ఇచ్చినవారేనని ట్రంప్ అన్నారు. ఆయన ఏఐని ‘సూపర్ ఇంటెలిజెన్స్’గా పేర్కొన్నారు.
“మనం సూపర్ ఇంటెలిజెన్స్‌ను ప్రోత్సహిస్తాం. ఏఐపై ఆంక్షలు విధించం” అని ట్రంప్ అన్నారు. ఏఐ అభివృద్ధి వేగాన్ని తగ్గించాలని ఇటీవల కొందరు ప్రముఖ టెక్ రంగ నిపుణులు చేసిన సూచనలకు ఇది సంకేతంగా భావించవచ్చు. ఏఐ రేసులో గెలిచే దేశమే ప్రపంచంలో ముందంజలో ఉంటుందని తాము ఇప్పటికే చెప్పామని ట్రంప్ పేర్కొన్నారు. అమెరికా ఏఐపై అధిక నియంత్రణలు, కఠినమైన చట్టాలు విధించడాన్ని వ్యతిరేకిస్తోందని ఆయన స్పష్టం చేశారు.
ఐసీసీ ‘నియంత్రణలేని సంస్థ’
ట్రంప్ ప్రసంగంలో అత్యంతగా దృష్టిని ఆకర్షించిన అంశాల్లో అంతర్జాతీయ క్రిమినల్ కోర్టు (ICC) ప్రస్తావన ఒకటి. ట్రంప్ ICCని ‘నియంత్రణలేని సంస్థ’గా అభివర్ణించారు. అలాగే ఆ సంస్థ సభ్య దేశాలు వెంటనే దాని నుంచి వైదొలగాలని, సభ్యత్వానికి రాజీనామా చేయాలని ఆయన కోరారు.
హోర్ముజ్‌పై టారిఫ్‌ల ప్రస్తావన
హోర్ముజ్ జలసంధిపై టారిఫ్‌లు విధించే అంశాన్ని ప్రస్తావిస్తూ అమెరికా అధ్యక్షుడు డొనాల్డ్ ట్రంప్ కీలక వ్యాఖ్యలు చేశారు. హోర్ముజ్ జలసంధి మీదుగా ఇటీవల 1 బిలియన్ బ్యారెళ్లకు పైగా చమురును తరలించే నౌకలకు అమెరికా నేవీ అనుమతి ఇచ్చిందని ఆయన తెలిపారు. ప్రస్తుతం అత్యధికంగా చమురు ఈ జలమార్గం గుండా రవాణా అవుతోందని ట్రంప్ పేర్కొన్నారు. వాణిజ్య నౌకలపై దాడులను ఖండిస్తూ తీర్మానం ఆమోదించినందుకు భద్రతా మండలికి ఆయన కృతజ్ఞతలు తెలిపారు. అలాగే ఇరాన్‌పై ఒత్తిడి కొనసాగించాలని అన్ని దేశాలను కోరారు.
అమెరికా ప్రపంచంలోనే అత్యంత శక్తివంతమైన దేశం
ఐక్యరాజ్యసమితి ప్రసంగంలో ట్రంప్ అమెరికా ఆర్థిక, సైనిక, సాంకేతిక శక్తిని ప్రస్తావించారు. అమెరికా ప్రపంచంలోనే అత్యుత్తమ, అత్యంత శక్తివంతమైన ఆర్థిక వ్యవస్థ అని ఆయన అన్నారు.“మా సైన్యం శక్తివంతమైనది. మా సాంకేతికతకు ప్రపంచంలో సాటి లేదు. ప్రతి రంగంలోనూ మేము మంచి పనితీరు కనబరుస్తున్నాం. రెండేళ్ల క్రితం మా దేశం అంతరించిపోయే పరిస్థితికి చేరుకుంది. కానీ ఇప్పుడు ప్రపంచంలోనే అత్యంత వేగంగా ముందుకు సాగుతున్న దేశంగా మారింది” అని ట్రంప్ పేర్కొన్నారు.
