
ప్రకృతి ఒకేసారి విరుచుకుపడితే పరిస్థితి ఎంత భయానకంగా ఉంటుందో చెప్పడానికి ప్రస్తుత పరిణామాలు నిదర్శనంగా నిలుస్తున్నాయి. ఒకవైపు అర్నాబ్ తీవ్ర తుఫాన్ ఏపీ, ఒడిశా కోస్తా తీరాలపై గాలులు, వర్షాలతో విరుచుకుపడుతుంటే.. సరిగ్గా అదే సమయంలో వరుస భూకంపాలు సంభవించడం ప్రపంచవ్యాప్తంగా ప్రజలను ఒక్కసారిగా తీవ్ర దిగ్భ్రాంతికి గురిచేసింది. గంటకు 140 కిలోమీటర్ల భీకర వేగంతో వీస్తున్న ఈదురుగాలుల ధాటికి వందలాది చెట్లు, విద్యుత్ స్తంభాలు నేలమట్టమయ్యాయి. రవాణా వ్యవస్థ పూర్తిగా స్తంభించిపోవడంతో రైల్వే శాఖ 50కి పైగా రైళ్లను రద్దు చేసింది, విమాన సర్వీసులు నిలిచిపోయాయి. కానీ ఈ తుఫాను బీభత్సం నడుమ కేవలం 24 గంటల వ్యవధిలో ఐదు వేర్వేరు ప్రాంతాల్లో భూమి కంపించడం అందరి గుండెల్లో రైళ్లు పరిగెత్తిస్తోంది.
నేషనల్ సెంటర్ ఫర్ సీస్మోలజీ అందించిన అధికారిక సమాచారం ప్రకారం అక్టోబర్ 27, 28 తేదీల మధ్య బంగాళాఖాతంలో 4.5 తీవ్రతతో మొదటి భూకంపం నమోదైంది. దీని లోతు కేవలం 10 కిలోమీటర్లు మాత్రమే కావడం గమనార్హం. ఆ వెంటనే అస్సాంలోని గోల్పారాలో 2.7, మయన్మార్లో 3.5, కోరల్ సముద్ర ప్రాంతంలో ఏకంగా 6.0, అలాగే మేఘాలయలోని పశ్చిమ ఖాసీ కొండల్లో 3.1 తీవ్రతతో వరుస ప్రకంపనలు వచ్చాయి. తుఫాను తీరాన్ని తాకడానికి సరిగ్గా ముందే సముద్ర గర్భంలోనూ, ఈశాన్య భారత్లోని కొండ ప్రాంతాల్లోనూ ఇలా వరుసగా భూమి కంపించడం వెనుక ఏదైనా వినాశకరమైన రహస్యం ఉందా? అసలు తుఫానుకు, ఈ భూకంపాలకు మధ్య ఏమైనా శాస్త్రీయ అనుబంధం ఉందా అని సగటు మనిషి భయాందోళన చెందుతున్నాడు.
Also Read : మందు బాటిళ్లకు ఆన్లైన్ బుకింగ్.. రూల్స్ ఇవే.. 48 గంటలు దాటితే!
సాధారణంగా చూస్తే తుఫాను అనేది వాతావరణంలో, ఆకాశంలో గాలి పీడనాల తేడా వల్ల ఏర్పడే ఒక విపత్తు. కానీ భూకంపం అనేది భూమి అడుగున ఉండే టెక్టోనిక్ ప్లేట్లు ఒకదానికొకటి ఢీకొనడం వల్ల కలిగే ప్రకంపన. పైకి ఇవి రెండూ వేర్వేరు ప్రకృతి దృగ్విషయాల్లా కనిపించినప్పటికీ ఆధునిక భూగర్భ శాస్త్రవేత్తలు వీటి మధ్య ఉన్న ఒక విచిత్రమైన, ప్రమాదకరమైన బంధాన్ని గుర్తించారు. శాస్త్రీయ పరిభాషలో దీనినే ‘స్టార్మ్క్వేక్’ అని పిలుస్తారు. సముద్రంలో ‘అర్నాబ్’ వంటి పెను తుఫాను అత్యంత శక్తివంతంగా బలపడుతున్నప్పుడు ఆ ప్రాంతంలో వాతావరణ ఒత్తిడి ఒక్కసారిగా దారుణంగా పడిపోతుంది.
ఈ పీడన వ్యత్యాసం వల్ల సముద్ర మట్టాలు రాక్షస అలలతో భారీగా ఎగసిపడతాయి. తత్ఫలితంగా లక్షలాది టన్నుల బరువైన నీటి ప్రవాహం నిరంతరం రాపిడితో సముద్ర గర్భాన్ని, సముద్రపు అడుగున ఉండే భూపటలాన్ని బలంగా కొడుతుంది. ఈ అపారమైన భౌతిక ఒత్తిడి, భారమైన నీటి బరువు కారణంగా భూమి లోపలి పొరల్లో స్వల్ప ప్రకంపనలు ఉత్పన్నమవుతాయని శాస్త్రవేత్తలు వివరిస్తున్నారు. అంటే సముద్రంలో తుఫాను మోసుకొచ్చే నీటి రాపిడే భూమి పొరలను కదిలించే స్థాయికి చేరుకుంటుంది.
అయితే తుఫాన్లు మాత్రమే పెద్ద స్థాయి భూకంపాలకు పూర్తి కారణమవుతాయని ఖచ్చితంగా చెప్పడానికి పరిశోధనాత్మక ఆధారాలు ఇంకా పరిమితంగానే ఉన్నాయి. అయినప్పటికీ ప్రస్తుతం ఒకేసారి అర్నాబ్ తుఫాను రావడం, దానితో పాటు వరుసగా భూమి కంపించడం సాధారణ విషయంగా కొట్టిపడేయలేం. ఇది ప్రకృతి మానవాళికి ఇస్తున్న ఒక తీవ్రమైన ముందస్తు హెచ్చరికగా నిపుణులు అభివర్ణిస్తున్నారు. తీరప్రాంత ప్రజలు కేవలం వర్షాలు, గాలులకే కాకుండా.. ఎలాంటి అత్యవసర పరిస్థితినైనా ఎదుర్కొనేలా సిద్ధంగా ఉండాలని, విపత్తు నిర్వహణ బృందాలు రెట్టింపు అప్రమత్తతతో నిరంతరం నిఘా ఉంచాలని అధికారులు స్పష్టం చేస్తున్నారు.
Also Read : ట్రంప్ సరికొత్త ప్లాన్.. ఎన్నికలు ముగియగానే ఇరాన్పై దాడి?









