US Military Officials : అంతర్జాతీయ రాజకీయాల్లోనూ, పశ్చిమాసియా ప్రాంతంలోనూ సరికొత్త యుద్ధ భయాలు తీవ్ర ఉత్కంఠను రేకెత్తిస్తున్నాయి. అమెరికాలో మధ్యంతర ఎన్నికల ప్రక్రియ పూర్తయిన వెంటనే ఇరాన్‌పై మరోసారి విధ్వంసకర దాడులకు తెగబడేందుకు ఇజ్రాయెల్‌తో కలిసి అధ్యక్షుడు డొనాల్డ్ ట్రంప్ అత్యంత రహస్య ప్రణాళికలు రచిస్తున్నట్లు సమాచారం. ఈ క్రమంలో వైట్ హౌస్ వేదికగా అత్యున్నత స్థాయిలో ఒక కీలక సైనిక సమావేశం జరగడం ప్రపంచ దేశాల దృష్టిని ఆకర్షించింది. టెహ్రాన్ నగరంపై ఏ క్షణంలోనైనా విరుచుకుపడేందుకు అనువుగా ప్రణాళికలను సిద్ధం చేసినట్లు తెలుస్తోంది.

వైట్ హౌస్‌లో జరిగిన ఈ అత్యున్నత స్థాయి భేటీలో అమెరికా రక్షణ మంత్రి పీట్ హెగ్సెత్‌, జాయింట్ చీఫ్స్ ఛైర్మన్ జనరల్ డాన్ కెయిన్, పశ్చిమాసియాలోని అమెరికా బలగాల ఉన్నత కమాండర్ అడ్మిరల్ బ్రాడ్ కూపర్‌లు అధ్యక్షుడు ట్రంప్‌కు సమగ్రమైన వార్ ప్లాన్‌పై బ్రీఫింగ్ ఇచ్చారు. ఇరాన్ దేశంలోని కీలక ప్రాంతాల్లో సైనికులను, ఆధునిక యుద్ధ విమానాలను ఎక్కడెక్కడ మోహరించాలనే అంశాలపై వ్యూహాత్మక వివరాలను అందించారు. రాబోయే సైనిక చర్యల నేపథ్యంలో అత్యంత అప్రమత్తంగా ఉండాలని సైనిక బలగాలను సంపూర్ణ సన్నద్ధతతో ఉంచుకోవాలని గల్ఫ్ దేశాలకు అమెరికా యంత్రాంగం ఇప్పటికే ముందస్తు హెచ్చరికలు జారీ చేసింది.

Also Read : అమెరికా ఆర్మీ సంచలన నిర్ణయం.. యుద్ధం ముందే సామూహిక సమాధుల శిక్షణ.. కారణమిదే!

ఈసారి అమెరికా-ఇజ్రాయెల్ కూటమి జరిపే భయంకరమైన దాడులలో ఇరాన్ ప్రధాన మౌలిక సదుపాయాలు, అత్యంత సున్నితమైన పీకాక్స్ పర్వతంతో పాటు ప్రధాన అణు స్థావరాలను లక్ష్యంగా చేసుకోబోతున్నట్లు తెలుస్తోంది. అధికారులు సిద్ధం చేసిన ఈ వినాశకర దాడుల ప్రణాళికకు అధ్యక్షుడు ట్రంప్ ఒకసారి ఆమోదముద్ర వేసిన వెంటనే సైనిక చర్య తక్షణమే అమలులోకి రానుంది. ఈ మిలిటరీ వ్యూహంపై ప్రతిపక్ష డెమోక్రటిక్ సెనెటర్ క్రిస్ మర్ఫీ స్పందిస్తూ.. ట్రంప్ యంత్రాంగం ఇరాన్‌పై మరోసారి విరుచుకుపడేందుకు సర్వసన్నద్ధమైందని.. అందుకోసం రూపొందించిన యుద్ధ ప్రణాళికల గురించి తమకు వివరించారని తెలిపారు. అయితే ఇటువంటి తీవ్ర నిర్ణయాల వల్ల ఉద్రిక్తతలు మరింత పెరిగిపోతాయని ఆయన హెచ్చరించారు.

మరొకవైపు తమను లొంగదీసుకోవాలని చూస్తే ఊరుకునేది లేదని ఇరాన్ ఘాటుగా స్పందించింది. తమతో ఒప్పందానికి అంగీకరించకపోతే సైనిక చర్య చేపడతామని ట్రంప్ చేసిన బెదిరింపులపై ఇరాన్ పార్లమెంట్ స్పీకర్ మొహమ్మద్ గాలిబఫ్ తీవ్ర విమర్శలు గుప్పించారు. భయపెట్టి తమను లొంగదీసుకోవాలని చూస్తే అగ్రరాజ్యానికి ఏ ప్రయోజనం ఉండదని, శాంతి చర్చల్లో పురోగతి రావాలంటే తాము విధించిన ఏడు షరతులకు అమెరికా కట్టుబడి ఉండాలని తేల్చి చెప్పారు. ఇదిలా ఉండగా హర్మూజ్ జలసంధిలో ప్రయాణిస్తున్న నాలుగు చమురు ట్యాంకర్లు సీమైన్లను ఢీకొన్నాయని ఐఆర్‌జీసీ ప్రకటించడం పరిస్థితి తీవ్రతకు అద్దం పడుతోంది. నిబంధనలు ఉల్లంఘించే నౌకలకు ఇలాంటి పరిణామాలే ఎదురవుతాయని హెచ్చరించడంతో పశ్చిమాసియాలో ఏ క్షణంలో ఏం జరుగుతుందోనని అంతర్జాతీయ సమాజం సస్పెన్స్‌తో నిరీక్షిస్తోంది.

Also Read : ఇజ్రాయెల్ రాజకీయాల్లో బిగ్ ట్విస్ట్.. నెతన్యాహు మైండ్ గేమ్.. విపక్ష నేతకే బిగ్ ఆఫర్!