
ఇజ్రాయెల్ రాజకీయాలు ప్రస్తుతం ఉత్కంఠభరితమైన మలుపు తిరిగాయి. ఇటీవల ముగిసిన ఎన్నికల్లో ఏ ఒక్క పార్టీ లేదా కూటమికి స్పష్టమైన మెజారిటీ దక్కకపోవడంతో తీవ్రమైన పొలిటికల్ సస్పెన్స్ మొదలైంది. ముఖ్యంగా దేశ ప్రధాని బెంజమిన్ నెతన్యాహు భవితవ్యం తీవ్ర ప్రమాదంలో పడింది. 2023లో జరిగిన హమాస్ దాడి తర్వాత ఇజ్రాయెల్లో మొదటిసారిగా జరిగిన ఈ జనరల్ ఎలక్షన్స్లో నెతన్యాహు కూటమికి అక్కడి ఓటర్లు భారీ షాక్ ఇచ్చారు.
మొత్తం 120 స్థానాలున్న ఇజ్రాయెల్ పార్లమెంట్లో ప్రభుత్వాన్ని ఏర్పాటు చేయడానికి 61 సీట్ల మెజారిటీ మార్క్ అవసరం. అయితే, ప్రస్తుత ప్రధాని నెతన్యాహు నేతృత్వంలోని కూటమి కేవలం 53 సీట్లకే పరిమితమైంది. గతంలో ఈ కూటమికి ఏకంగా 68 సీట్ల బలం ఉండగా, తాజా ఎన్నికల ఫలితాలు నెతన్యాహు ఆధిపత్యానికి గండి కొట్టాయి. దీంతో అక్కడ తీవ్ర రాజకీయ అనిశ్చితి నెలకొంది.
ఏకమవుతున్న ప్రతిపక్షాలు.. తెరపైకి మాజీ ఆర్మీ చీఫ్
ఇదే సమయంలో నెతన్యాహును అధికారం నుంచి దించేందుకు ప్రధాన ప్రతిపక్షాలు తమ వ్యూహాలకు పదును పెడుతున్నాయి. నెతన్యాహు వ్యతిరేక యూదు పార్టీలు 48 సీట్లను కైవసం చేసుకున్నాయి. మరోవైపు, ఈ ఎన్నికల్లో అత్యంత కీలకంగా మారిన రెండు ప్రధాన అరబ్ పార్టీలు ‘రామ్’, ‘జాయింట్ లిస్ట్’ సంయుక్తంగా 19 సీట్లు గెలుచుకుని సూపర్ పవర్గా అవతరించాయి.
తాజా సమాచారం ప్రకారం, నెతన్యాహును గద్దె దించడమే లక్ష్యంగా ఇజ్రాయెల్ డిఫెన్స్ ఫోర్సెస్ (IDF) మాజీ చీఫ్ ఆఫ్ స్టాఫ్ గాది ఐసెన్కోట్ నాయకత్వంలోని ప్రతిపక్ష కూటమికి మద్దతు ఇచ్చేందుకు ఈ అరబ్ పార్టీలు గ్రీన్ సిగ్నల్ ఇచ్చినట్లు తెలుస్తోంది. ఈ రెండు వర్గాలు కలిస్తే నెతన్యాహు వ్యతిరేక కూటమి బలం 67 సీట్లకు చేరుకుంటుంది. అంటే ప్రభుత్వాన్ని ఏర్పాటు చేయడానికి కావాల్సిన 61 కంటే ఇది చాలా ఎక్కువ.
అయితే, ఈ అరబ్ పార్టీలు ప్రభుత్వంలో నేరుగా చేరకుండా బయటి నుంచి ఎక్స్టర్నల్ సపోర్ట్ ఇచ్చే యోచనలో ఉన్నాయి. గతంలో 1993 నాటి చారిత్రాత్మక ‘ఓస్లో ఒప్పందం’ సమయంలో అప్పటి ప్రధాని యిట్జాక్ రాబిన్ ప్రభుత్వానికి అరబ్ పార్టీలు ఇదే విధంగా వెలుపలి నుంచి మద్దతు ప్రకటించాయి. ఇప్పుడు అదే ఫార్ములాను అమలు చేస్తూ గాది ఐసెన్కోట్కు మద్దతివ్వాలని భావిస్తున్నాయి.
కొత్త గవర్నమెంట్ను ఆహ్వానించే ప్రాసెస్లో భాగంగా, ప్రెసిడెంట్ ఇసాక్ హెర్జోగ్ను కలిసి తదుపరి ప్రధానిగా ఐసెన్కోట్ పేరును రికమండ్ చేయనున్నట్లు అరబ్ నేతలు స్పష్టం చేశారు. ఈ అనూహ్య రాజకీయ సమీకరణలు గానీ కార్యరూపం దాల్చితే, ఇజ్రాయెల్ను అత్యధిక కాలం పాలించిన నాయకుడిగా రికార్డు సృష్టించిన బెంజమిన్ నెతన్యాహు తన ప్రధాని పీఠాన్ని ఖాళీ చేయడం లాంఛనమే కానుంది.









