అమెరికా మిడ్‌టర్మ్ ఎన్నికల్లో కీలకమైన న్యూయార్క్ అటార్నీ జనరల్ పదవికి రిపబ్లికన్ పార్టీ తరఫున పోటీ చేసిన తెలుగు సంతతి మహిళ సరితా కోమటిరెడ్డి(Saritha Komatireddy) ఓటమిపాలయ్యారు. ఈ ఎన్నికల్లో ఆమె డెమోక్రటిక్ పార్టీకి చెందిన సిట్టింగ్ అభ్యర్థి లెటిటియా జేమ్స్ చేతిలో పరాజయం చెందారు. మాజీ అధ్యక్షుడు డొనాల్డ్ ట్రంప్ మద్దతుతో బరిలోకి దిగినప్పటికీ ఆమెకు విజయం దక్కలేదు. అయితే ఫలితాలు వెలువడిన అనంతరం సరితా కోమటిరెడ్డి ఎంతో హుందాగా తన ఓటమిని అంగీకరిస్తూ సోషల్ మీడియా వేదిక ‘X’ లో ఒక ఎమోషనల్ పోస్ట్ చేశారు.

Also Read : అమెరికా ఎన్నికల్లో సంచలనం.. జిహాదీ అన్న ట్రంప్‌కు బిగ్ షాక్.. యూఎస్ తొలి ముస్లిం సెనేటర్‌గా అబ్దుల్ చరిత్ర!

“ప్రజాసేవ అంటే వ్యక్తిగత లాభం కాదు”

ఎన్నికల ఫలితాలపై స్పందించిన సరిత.. తన క్యాంపెయిన్‌కు అండగా నిలిచిన వేలాది మంది వాలంటీర్లు, సపోర్టర్లు, న్యూయార్క్ ప్రజలందరికీ మనస్ఫూర్తిగా కృతజ్ఞతలు తెలిపారు. “మేము నడిపిన ప్రచారం పట్ల నాకు గర్వంగా ఉంది. రాజకీయాలు అంటే కేవలం విద్వేషం, విభజన మాత్రమే కాదని, ప్రజలందరినీ ఒక తాటిపైకి తీసుకురావడమేనని మా క్యాంపెయిన్ నిరూపించింది. అసలైన పబ్లిక్ సర్వీస్ అంటే సెలబ్రిటీ హోదా లేదా వ్యక్తిగత లాభాల కోసం కాకుండా నిస్వార్థంగా ప్రజలకు సేవ చేయడమే. ఎన్నికల్లో ఓడినప్పటికీ ప్రజలకు మేలు చేసే సంకల్పాన్ని వదులుకోను. రాబోయే రోజుల్లో కూడా న్యూయార్క్‌ను మరింత సేఫ్ అండ్ స్ట్రాంగ్‌గా మార్చడానికి నా వంతు కృషి చేస్తాను” అని ఆమె స్పష్టం చేశారు. ఎన్నికల ముందు జరిగిన ప్రీ-ఎలక్షన్ డిబేట్‌లో లెటిటియా జేమ్స్‌తో సమానంగా వాదనలు వినిపించి సరిత విశేష గుర్తింపు తెచ్చుకున్నారు.

Also Read : 15 సెకన్లలోనే నిందితుడి ఆటకట్టు.. తెలంగాణ పోలీస్ సరికొత్త హైటెక్ విప్లవం!

ఎవరీ సరితా కోమటిరెడ్డి?

41 ఏళ్ల సరితా కోమటిరెడ్డి కుటుంబ మూలాలు తెలంగాణలో ఉన్నాయి. ఆమె తల్లిదండ్రులు దశాబ్దాల క్రితమే అమెరికాకు వలస వెళ్లారు. న్యూయార్క్‌లోని బ్రూక్లిన్‌లో జన్మించిన సరిత, ఆ తర్వాత మిస్సోరిలో పెరిగారు. ఆమెకు లీగల్ ప్రొఫెషన్‌లో సుదీర్ఘ అనుభవం ఉంది. ప్రఖ్యాత కొలంబియా లా స్కూల్‌లో లెక్చరర్‌గా కెరీర్ ప్రారంభించి, ఆ తర్వాత ఫెడరల్ ప్రాసిక్యూటర్‌గా కీలక బాధ్యతలు నిర్వర్తించారు. డ్రగ్ ట్రాఫికింగ్, టెర్రరిజం, సైబర్ క్రైమ్, మనీలాండరింగ్ వంటి హై-ప్రొఫైల్ క్రిమినల్ కేసుల్లో ప్రాసిక్యూషన్‌ను సమర్థవంతంగా నడిపించారు. అంతేకాకుండా, అమెరికా డ్రగ్ ఎన్‌ఫోర్స్‌మెంట్ అడ్మినిస్ట్రేషన్ (DEA)లో చీఫ్ ఆఫ్ స్టాఫ్‌గా కూడా ఆమె సేవలందించారు.