
అమెరికాలో జరిగిన మధ్యంతర ఎన్నికల్లో ఎదురైన ఘోర ఓటమితో అధ్యక్షుడు డొనాల్డ్ ట్రంప్ తన వైఖరిలో మార్పు తెచ్చారు. ఇప్పటివరకు తాను అనుసరించిన కఠినమైన వలస విధానాలపై కీలక వ్యాఖ్యలు చేశారు. చట్టబద్ధంగా జీవిస్తూ.. పన్నులు చెల్లించే సాధారణ వలసదారుల పట్ల అధికారులు కఠినంగా వ్యవహరించి ఉండకూడదని అంగీకరించారు. నేరస్థులను దేశం నుంచి బయటికి గెంటడంలో విజయం సాధించినప్పటికీ సామాన్యులను ఇబ్బంది పెట్టడం వల్ల పార్టీకి నష్టం జరిగిందని అభిప్రాయపడ్డారు. అలాంటి మంచి వలసదారులకు భవిష్యత్తులో చట్టబద్ధత కల్పించేలా ఒక ఒప్పందం కుదుర్చుకునే అవకాశం ఉందని ట్రంప్ సంకేతాలిచ్చారు. ఎన్నికల ఫలితాల దెబ్బతో ట్రంప్ తన పంథాను మార్చుకుంటున్నట్లు ఈ పరిణామాలు స్పష్టం చేస్తున్నాయి.
Also Read : పాకిస్తాన్లో చైనా ప్రాజెక్ట్కు బిగ్ షాక్: కుప్పకూలిన కాఫర్డ్యామ్!
అమెరికాలో నివసిస్తున్న విదేశీయుల పట్ల ముఖ్యంగా సరైన పత్రాలు లేని వలసదారులపై తమ అధికారులు చేపట్టిన కఠినమైన చర్యలు, నిర్బంధాలు, దేశ బహిష్కరణలు అనుకున్న దానికంటే ఎక్కువ ప్రతికూల ప్రభావాన్ని చూపాయని ట్రంప్ ఈ సందర్భంగా వెల్లడించారు. మా ప్రభుత్వం అమలు చేసిన వలస విధానం మరీ అంత కఠినంగా, కఠోరంగా ఉండి ఉండకూడదని నేను ఇప్పుడు భావిస్తున్నాను. తీవ్రమైన నేరాలకు పాల్పడే ఘోర నేరగాళ్లను, చట్టాన్ని ఉల్లంఘించే క్రిమినల్స్ను దేశం నుంచి తరిమికొట్టడంలో మా ప్రభుత్వం పూర్తి విజయం సాధించింది. ఆ విషయంలో మాకు మంచి మార్కులే పడ్డాయి. అందులో ఎలాంటి సందేహం లేదు. కానీ, అమెరికాలోనే ఉంటూ మంచి ఉద్యోగాలు చేసుకుంటూ, క్రమం తప్పకుండా పన్నులు చెల్లిస్తూ, చిన్న చిన్న సాంకేతిక నిబంధనలు మాత్రమే ఉల్లంఘించిన సామాన్యులను కూడా అధికారులు ఒకే గాటన కట్టి వేధించడం వల్ల పార్టీకి, ప్రభుత్వానికి పెద్ద నష్టం జరిగిందని ట్రంప్ స్పష్టం చేశారు.
అంతేకాకుండా ఇలాంటి సామాన్య వలసదారులకు భవిష్యత్తులో లీగల్ స్టేటస్ అంటే చట్టబద్ధత కల్పించేందుకు అనుకూలంగా ఒక ప్రత్యేక ఒప్పందం చేసుకునే అవకాశం ఉందనే సంకేతాలను కూడా ట్రంప్ ఇచ్చారు. దశాబ్దాలుగా అమెరికా ఆర్థిక వ్యవస్థకు ఊతం ఇస్తూ.. స్థానికంగా ఉపాధి పొందుతున్న మంచి వలసదారులకు రక్షణ కల్పించే దిశగా కొత్త నిర్ణయాలు తీసుకుంటామని ఆయన హామీ ఇచ్చారు. మధ్యంతర ఎన్నికల ఫలితాలు తమ కళ్లు తెరిపించాయని ప్రజల అభిప్రాయాలకు అనుగుణంగా కొన్ని విషయాల్లో తగ్గక తప్పదని ఆయన మాటలను బట్టి అర్థమవుతోంది.
వలస విధానాలనే కాకుండా అంతర్జాతీయ విదేశాంగ విధానంలోనూ ట్రంప్ వెనక్కి తగ్గుతున్నట్లు కనిపిస్తోంది. పశ్చిమాసియాలో ఉద్రిక్తతలకు కారణమైన ఇరాన్పై సైనిక దాడులను మళ్లీ వెంటనే పునఃప్రారంభించకపోవచ్చని ఇదే ఇంటర్వ్యూలో ఆయన పరోక్షంగా సూచించారు. యుద్ధాలు, సైనిక దాడుల కంటే దేశీయ సంక్షేమం, వలస విధానాల ప్రక్షాళనపైనే దృష్టి సారించాల్సిన అవసరం ఉందనే కోణంలో ట్రంప్ ఈ నిర్ణయాలు తీసుకుంటున్నట్లు తెలుస్తోంది. మొత్తం మీద మధ్యంతర ఎన్నికల షాక్ తర్వాత ట్రంప్ తీసుకుంటున్న ఈ అనూహ్య నిర్ణయాలు, సడలింపులు అమెరికా రాజకీయ భవిష్యత్తును ఏ తీరానికి చేరుస్తాయో వేచి చూడాలి.
Also Read : మళ్లీ మొదలైన టెన్షన్.. ఎవరికీ అంతుచిక్కని కరోనా కొత్త సైలెంట్ మహమ్మారి.. WHO స్ట్రాంగ్ వార్నింగ్!









