Global Survey : ప్రపంచంలోనే అత్యంత వేగంగా విస్తరిస్తున్న బీర్ మార్కెట్లలో భారతదేశం సరికొత్త రికార్డు సృష్టించింది. ‘కిరిన్ హోల్డింగ్స్’ అందించిన గణాంకాల ఆధారంగా ‘విజువల్ క్యాపిటలిస్ట్’ ఒక ప్రత్యేక నివేదికను రూపొందించింది. దీని ప్రకారం, ప్రపంచంలోని ప్రముఖ మార్కెట్లతో పోలిస్తే భారత్లో బీర్ వినియోగం ఊహించని రీతిలో పుంజుకుంటోందని వెల్లడైంది. మొత్తం వినియోగం పరంగా భారత్ ఇంకా ప్రపంచంలోనే అతిపెద్ద దేశాల జాబితాలోకి చేరనప్పటికీ, ఆ వినియోగంలో కనిపిస్తున్న వార్షిక వృద్ధి రేటులో మాత్రం అగ్రస్థానంలో నిలిచింది.
గడిచిన 2024 సంవత్సరంలో భారతదేశంలో బీర్ వినియోగం అంతకుముందు ఏడాదితో పోలిస్తే ఏకంగా 14.6 శాతం పెరిగినట్లు ఈ నివేదిక స్పష్టం చేసింది. ప్రపంచంలోని ప్రధాన బీర్ మార్కెట్లన్నింటిలోనూ ఇదే అత్యధిక వృద్ధి రేటు కావడం విశేషం. దేశంలో యువత జనాభా ఎక్కువగా ఉండటం, మారుతున్న ఆధునిక జీవనశైలి, ప్రజల ఆదాయాలు పెరగడం మరియు శరవేగంగా జరుగుతున్న పట్టణీకరణే ఈ మార్పుకు ప్రధాన కారణాలుగా నిపుణులు విశ్లేషిస్తున్నారు. ఈ భారీ వృద్ధిని గమనిస్తున్న అంతర్జాతీయ మాల్ట్ తయారీదారులు, గ్లోబల్ బ్రూయింగ్ కంపెనీలు దీర్ఘకాలిక పెట్టుబడుల కోసం భారత్ను ఒక కీలకమైన కేంద్రంగా గుర్తిస్తున్నాయి.
ఇక మొత్తం వినియోగం (వాల్యూమ్) పరంగా చూస్తే ప్రపంచంలోనే చైనా మొదటి స్థానంలో కొనసాగుతోంది. 2024లో చైనాలో దాదాపు 4,050 కోట్ల లీటర్ల బీర్ వినియోగం జరిగింది. ఇది రెండో స్థానంలో ఉన్న అమెరికా (2,230 కోట్ల లీటర్లు) వినియోగం కంటే దాదాపు రెట్టింపు కావడం గమనార్హం. ఈ జాబితాలో ఆ తర్వాతి స్థానాల్లో వరుసగా బ్రెజిల్ (1,530 కోట్ల లీటర్లు), మెక్సికో (1,080 కోట్ల లీటర్లు), రష్యా (950 కోట్ల లీటర్లు) నిలిచాయి. ఐరోపా ఖండంలో జర్మనీ అత్యధికంగా బీర్ ఉత్పత్తి చేసే దేశంగా ఉన్నప్పటికీ, అక్కడ యువత మద్యపానానికి క్రమంగా దూరమవుతుండటంతో స్థానిక వినియోగం తగ్గుముఖం పట్టింది.
మరోవైపు, దేశ జనాభాను పక్కన పెట్టి ఒక వ్యక్తి సగటున తాగే ‘తలసరి వినియోగం’ (Per Capita Consumption) లెక్కలను పరిశీలిస్తే మాత్రం యూరప్ దేశాలు మొదటి స్థానంలో నిలిచాయి. గత మూడు దశాబ్దాలుగా చెక్ రిపబ్లిక్ దేశం ఈ తలసరి వినియోగంలో ప్రపంచంలోనే తిరుగులేని లీడర్గా కొనసాగుతోంది. ఇక్కడ సగటున ఒక వ్యక్తి ఏడాదికి ఏకంగా 149 లీటర్ల బీర్ తాగుతున్నట్లు సర్వే వెల్లడించింది. ఆ తర్వాత లిథువేనియా, ఆస్ట్రియా, ఐర్లాండ్, క్రొయేషియా దేశాలు అత్యధిక తలసరి వినియోగంతో తర్వాతి స్థానాల్లో నిలిచాయి. 2024లో ప్రపంచవ్యాప్తంగా మొత్తం 19,400 కోట్ల లీటర్ల బీర్ వినియోగం జరగ్గా.. చైనా, జర్మనీల వంటి పాత మార్కెట్లు నెమ్మదించినప్పటికీ, భారత్, మెక్సికో, రష్యాల వంటి అభివృద్ధి చెందుతున్న దేశాల మార్కెట్లు గ్లోబల్ బీర్ రంగాన్ని ముందుకు నడిపిస్తున్నాయి.
