పశ్చిమాసియాలో ఉద్రిక్తతలు కొనసాగుతున్న వేళ, అమెరికా అధ్యక్షుడు డొనాల్డ్ ట్రంప్ కీలక నిర్ణయం తీసుకున్నారు. ఇరాన్‌పై మళ్లీ మిలిటరీ దాడులు చేసే ఆలోచన ప్రస్తుతానికి లేదని ఆయన స్పష్టం చేశారు. యుద్ధం కంటే చర్చల ద్వారానే సమస్యలను పరిష్కరించుకోవాలనే ఆలోచనతో ఆయన ఉన్నట్లు తెలుస్తోంది.

Also Read : అసలేం జరుగుతోంది: అమెరికా రక్షణ మంత్రిపై వేటు.. ఎవరీ పీట్ హెగ్సెత్?

నెతన్యాహు డైలీ కాల్స్.. రాజకీయ లబ్ధి కోసమేనా?

ఇజ్రాయెల్ ప్రధాని బెంజమిన్ నెతన్యాహు ప్రతిరోజూ ట్రంప్‌కు ఫోన్ చేసి, టెహ్రాన్‌పై మరోసారి దాడులు చేద్దామని ఒత్తిడి తెచ్చేవారని యూఎస్ మీడియా కథనాలు వెల్లడించాయి. సొంత దేశంలో పొలిటికల్ మైలేజ్ కోసమే నెతన్యాహు ఈ విధమైన ఒత్తిడి తెచ్చినట్లు విశ్లేషకులు భావిస్తున్నారు. ముఖ్యంగా యూఎస్ మిడ్‌టర్మ్ ఎలక్షన్స్ ఫలితాలు వెలువడిన వెంటనే, ఇరాన్‌పై విరుచుకుపడాలని నెతన్యాహు పదే పదే ప్రతిపాదించినట్లు సమాచారం.

చర్చలకే మొగ్గు చూపిన ట్రంప్

నెతన్యాహు నుంచి ఎంత ఒత్తిడి వచ్చినప్పటికీ ట్రంప్ మాత్రం గ్రీన్ సిగ్నల్ ఇవ్వలేదు. యుద్ధానికి బదులుగా ఇరాన్‌తో దౌత్యపరమైన ఒప్పందం చేసుకోవడానికే ట్రంప్ మొగ్గు చూపుతున్నారని వైట్‌హౌస్ వర్గాలు స్పష్టం చేశాయి. మిలిటరీ యాక్షన్ వల్ల సమస్య మరింత జటిలమవుతుందనే భావనలో అమెరికా ఉన్నట్లు తెలుస్తోంది.

Also Read : అమెరికా రాజకీయాల్లో సడన్ ట్విస్ట్.. ఓటమి తర్వాత ట్రంప్‌ వేసిన ఊహించని స్కెచ్!

రిపబ్లికన్ల వెనకడుగుకు యుద్ధ ప్రభావం

గతంలో ఇరాన్ చుట్టూ నెలకొన్న ఉద్రిక్తతలు, యుద్ధ వాతావరణం అమెరికా అంతర్గత రాజకీయాలపై తీవ్ర ప్రభావం చూపాయి. యూఎస్ కాంగ్రెస్‌లో అధికార రిపబ్లికన్ పార్టీ తన పట్టును కోల్పోవడానికి ఇరాన్ వ్యవహారమే ప్రధాన కారణాలలో ఒకటని రాజకీయ విశ్లేషకులు గుర్తుచేస్తున్నారు. ఈ చేదు అనుభవాన్ని దృష్టిలో ఉంచుకునే ట్రంప్ ప్రభుత్వం సరికొత్త దాడులకు దూరంగా ఉంటూ, శాంతి చర్చల వైపు అడుగులు వేయాలని నిర్ణయించుకుంది.