Pavitra Gowda : రేణుకాస్వామి హత్య కేసులో జైలులో ఉన్న నటి పవిత్రా గౌడకు జైలులో వేధింపులు ఎదురవుతున్నాయి. జైలులో తనను నైజీరియన్‌ మహిళలు వేధిస్తున్నారంటూ ఆమె కన్నీరు కార్చింది. తనకు బెయిలు ఇవ్వాలని లేదా చనిపోయేందుకు విషం ఇవ్వాలంటూ న్యాయమూర్తి ముందు తన ఆవేదన వ్యక్తం చేశారు. తనకు ప్రత్యేక బ్యారక్ కేటాయించాలని పవిత్రా గౌడ కోరారు.
పవిత్రా గౌడను కలిసేందుకు ఆమె తరఫు న్యాయవాదులు జైలుకు వెళ్లిన సమయంలో, అక్కడి పరిస్థితులపై ఆమె తీవ్రంగా ఆవేదన వ్యక్తం చేసినట్లు కోర్టుకు తెలిపారు. జైలులో పరిస్థితులు భరించలేకపోతున్నానని, తనకు విషం ఇవ్వండి అని పవిత్రా గౌడ చెప్పినట్లు న్యాయవాదులు కోర్టు దృష్టికి తీసుకెళ్లారు. కోర్టు ఆదేశాలతో ఆమెను ఇప్పటికే మరో బ్యారక్‌కు మార్చామని సిట్ తరఫు న్యాయవాదులు స్పష్టం చేశారు. కాగా చిత్రదుర్గకు చెందిన రేణుకాస్వామి హత్య కేసులో నటి పవిత్రా గౌడ ఏ1 నిందితురాలుగా ఉన్నారు.
Also Read : ప్యారడైజ్‌ కు బిగ్ షాక్‌… టికెట్‌ ధరల పెంపుపై హైకోర్టు కీలక వ్యాఖ్యలు
రేణుకాస్వామి హత్య కేసు ఏంటి?
రేణుకాస్వామి కర్ణాటకలోని చిత్రదుర్గకు చెందిన 33 ఏళ్ల వ్యక్తి. ఆయన కన్నడ హీరో దర్శన్‌కు అభిమాని. 2024 జూన్‌లో రేణుకాస్వామి హత్యకు గురయ్యారు. ఆయన మృతదేహం బెంగళూరులోని ఓ డ్రైనేజీ వద్ద లభించింది. పోలీసుల దర్యాప్తు ప్రకారం, రేణుకాస్వామి సోషల్ మీడియాలో పవిత్రా గౌడకు అభ్యంతరకరమైన మెసేజ్‌లు పంపినట్లు ఆరోపణలు వచ్చాయి.
ఈ విషయం తర్వాత అతడిని చిత్రదుర్గ నుంచి బెంగళూరుకు తీసుకువచ్చినట్లు పోలీసులు చెబుతున్నారు. ఆ తర్వాత బెంగళూరులోని ఓ షెడ్‌లో రేణుకాస్వామిపై దాడి జరిగినట్లు పోలీసుల ఛార్జ్‌షీట్‌లో పేర్కొన్నారు. ఈ దాడిలో అతడికి తీవ్ర గాయాలు అయ్యాయని, చివరకు అతడు చనిపోయినట్లు దర్యాప్తులో తేలిందని పోలీసులు తెలిపారు. ఈ కేసులో కన్నడ నటుడు దర్శన్, పవిత్రా గౌడతో పాటు పలువురిని పోలీసులు నిందితులుగా చేర్చారు.
పోలీసుల ప్రకారం, రేణుకాస్వామిని తీసుకురావడం, అతడిపై దాడి చేయడం, తర్వాత మృతదేహాన్ని తరలించడం వంటి పనుల్లో పలువురు నిందితుల పాత్ర ఉందని ఆరోపించారు. ఈ కేసులో దర్శన్, పవిత్రా గౌడ ఇద్దరూ నిందితులుగా ఉన్నారు. అయితే కోర్టులో కేసు విచారణ జరుగుతున్నందున, పోలీసులు చేసిన ఆరోపణలు తుది న్యాయ తీర్పు కాదని గుర్తుంచుకోవాలి. 2025 నవంబర్‌లో బెంగళూరు సెషన్స్ కోర్టు 17 మంది నిందితులపై హత్య సహా పలు అభియోగాలు నమోదు చేసింది.
Also Read : రూ.50 కోట్ల చెక్కులు.. సోదరి, సోదరుడిపై కేసు పెట్టిన హీరోయిన్!
