Karnataka : కర్ణాటకకు కావేరి జలాల విషయంలో గట్టి ఎదురుదెబ్బ తగిలింది. తమిళనాడుకు ప్రతిరోజూ 3,500 క్యూసెక్కుల నీటిని విడుదల చేయాలని కావేరి వాటర్ మేనేజ్మెంట్ అథారిటీ ఆదేశాలు జారీ చేసింది.
ఈ ఆదేశాలు జూలై 29 నుంచి వెనక్కి వర్తించేలా అమల్లోకి వస్తాయని స్పష్టం చేసింది. తమిళనాడు రోజుకు 7,000 క్యూసెక్కుల చొప్పున 15 రోజుల పాటు మొత్తం 9 టీఎంసీల నీటిని విడుదల చేయాలని కోరింది. అయితే తమిళనాడు డిమాండ్ను తోసిపుచ్చిన కావేరి వాటర్ రెగ్యులేషన్ కమిటీ సిఫారసు మేరకు రోజుకు 3,500 క్యూసెక్కుల చొప్పున 15 రోజుల పాటు నీటిని విడుదల చేయాలని అథారిటీ తేల్చిచెప్పింది.
తమ రాష్ట్ర అవసరాల దృష్ట్యా ఇప్పట్లో నీటిని విడుదల చేసే స్థితిలో లేమన్న కర్ణాటక వాదనను అథారిటీ తోసిపుచ్చింది. అథారిటీ తాజా ఉత్తర్వులతో కర్ణాటకకు ఇక సుప్రీంకోర్టును ఆశ్రయించడం ఒక్కటే మిగిలిన చట్టపరమైన మార్గమని నిపుణులు చెబుతున్నారు.
ఈ పరిణామాలపై కర్ణాటక ఉప ముఖ్యమంత్రి డీకే శివకుమార్ స్పందిస్తూ.. కావేరి అంశంపై ఆదివారం అక్షరాలా అక్షరాల అన్ని పార్టీల సమావేశాన్ని ఏర్పాటు చేశామని తెలిపారు. రెండు రాష్ట్రాల ప్రయోజనాలను దృష్టిలో ఉంచుకుని చర్చలు జరుపుతామని ఆయన పేర్కొన్నారు.
మరోవైపు సీడబ్ల్యూఆర్సీ ఆదేశాలను నిరసిస్తూ కర్ణాటకలోని మండ్యలో కన్నడ కార్యకర్తలు తమ ఆందోళనలను ఉధృతం చేశారు. ఈ నిరసనల్లో భాగంగా తమిళనాడు ముఖ్యమంత్రి సీ జోసెఫ్ విజయ్ నటించిన ‘జన నాయగన్’ సినిమా పోస్టర్లను చింపివేశారు. ఆ చిత్ర ప్రదర్శనను నిలిపివేయాలని డిమాండ్ చేయడంతో, మండ్యలోని గురుశ్రీ సినిమా థియేటర్ యాజమాన్యం సినిమా ప్రదర్శనను రద్దు చేసుకోవడానికి అంగీకరించింది.
తమిళనాడుకు కావేరి నీటిని విడుదల చేయవద్దని, మండ్యలో రైతుల ఆందోళనకు మద్దతు తెలపాలని కోరుతూ కార్యకర్తలు జిల్లా కలెక్టర్ ద్వారా రాష్ట్ర ప్రభుత్వానికి వినతిపత్రం అందజేశారు. మాకు తాగునీరు కూడా లేదని, పశువులకు నీరు దొరకని దయనీయ పరిస్థితిలో ప్రజలు ఉన్నారని ఆందోళనకారులు ఆవేదన వ్యక్తం చేశారు. ఈ సమస్యను వ్యక్తిగతంగా పరిష్కరించేలా చర్యలు తీసుకోవాలని వారు ప్రభుత్వాన్ని కోరారు.
