CJP : దేశవ్యాప్తంగా పేపర్ లీకేజీలకు వ్యతిరేకంగా సాగుతున్న విద్యార్థుల ఉద్యమం రోజుకో మలుపు తిరుగుతోంది. కేంద్ర ప్రభుత్వం తనకు ఇచ్చిన మాటను నిలబెట్టుకోవడంలో పూర్తిగా విఫలమైందని కాక్రోచ్ జనతా పార్టీ (CJP) అధికార ప్రతినిధి సౌరవ్ దాస్ తీవ్రస్థాయిలో ధ్వజమెత్తారు. దేశవ్యాప్తంగా ఆందోళనలు చేపట్టిన విద్యార్థులు, నిరసనకారులపై నమోదైన పోలీసు కేసులను (FIRs) తక్షణమే ఉపసంహరించుకుంటామని కేంద్ర మంత్రులు ఇచ్చిన హామీతోనే తాము ఆందోళనలను తాత్కాలికంగా విరమించామని ఆయన గుర్తుచేశారు.
అయితే, కేంద్రం మాట తప్పిందని, ఇప్పటివరకు విద్యార్థులపై పెట్టిన కేసులను ఎత్తివేయకపోగా, అస్సాం, పశ్చిమ బెంగాల్, బీహార్ వంటి రాష్ట్రాల్లో నిరసనకారులను పోలీసులు అక్రమంగా అరెస్టు చేస్తున్నారని సౌరవ్ దాస్ ఆరోపించారు. ఈ వ్యవహారంపై న్యాయవాదులతో సంప్రదింపులు జరుపుతున్నామని, రేపటిలోగా బాధితులపై పెట్టిన కేసులన్నింటినీ రద్దు చేసి, నిర్బంధంలో ఉన్న నిరసనకారులను విడుదల చేయాలని ఆయన డిమాండ్ చేశారు. లేనిపక్షంలో దేశవ్యాప్త పోరాటాన్ని తిరిగి ప్రారంభిస్తామని, ఈ విషయంలో కేంద్ర మంత్రులు జేపీ నడ్డా, జితేంద్ర సింగ్ తక్షణమే జోక్యం చేసుకోవాలని స్పష్టం చేశారు.
మరోవైపు, బీహార్లో ప్రతిపక్షాలు,కేంద్ర ప్రభుత్వం మధ్య రాజకీయ వేడి రాజుకుంది. బీహార్లో శాంతియుతంగా నిరసన తెలుపుతున్న విద్యార్థులపైకి పోలీసులు ఏకే-47 తుపాకులతో కాల్పులకు తెగబడ్డారని, ఢిల్లీలో పెల్లెట్ గన్లను ఉపయోగించారని కాంగ్రెస్ అగ్రనేత రాహుల్ గాంధీ తీవ్ర ఆరోపణలు చేశారు. యువత గొంతు నొక్కడమే లక్ష్యంగా కేంద్రం తప్పుడు హామీలు ఇస్తోందని విమర్శించారు. జులై 25న జరిగిన ‘బీహార్ బంద్’ సమయంలో సివాన్ జిల్లాలో ఒక కానిస్టేబుల్ ఆందోళనకారులపైకి ఏకే-47 ఎక్కుపెట్టిన వీడియో వైరల్ కావడంతో సదరు కానిస్టేబుల్ను అధికారులు సస్పెండ్ చేశారు.
ఢిల్లీలో జులై 20న విద్యార్థులు జరిపిన ఆందోళనల వేళ పోలీసులు జరిపిన లాఠీఛార్జీ, మితిమీరిన బలప్రయోగాన్ని దేశ అత్యున్నత న్యాయస్థానం సుప్రీంకోర్టు తీవ్రంగా తప్పుబట్టింది. రాజ్యాంగం ప్రకారం శాంతియుత నిరసనలు తెలిపే ప్రాథమిక హక్కు పౌరులకు ఉంటుందని భారత ప్రధాన న్యాయమూర్తి (CJI) జస్టిస్ సూర్యకాంత్ స్పష్టం చేశారు. ఆందోళనలను నెపంగా చూపి విద్యార్థులపై పోలీసు బలగాలను ఉపయోగించడం ఎంతమాత్రం తగిన చర్య కాదని ఆగ్రహం వ్యక్తం చేశారు.
Also Read : ఆగస్టు 1 నుంచి జేబుకు చిల్లు.. మారబోతున్న 5 రూల్స్.. అవేంటంటే?
శాంతియుత నిరసనలు తెలిపే హక్కును పరిరక్షిస్తూనే, పోలీసుల చర్యలకు సంబంధించి దేశవ్యాప్తంగా స్పష్టమైన, ఏకరూప మార్గదర్శకాలు (Uniform Guidelines) రూపొందించాల్సిన అవసరం ఉందని ప్రధాన న్యాయమూర్తి అభిప్రాయపడ్డారు. బాధితులు దాఖలు చేసిన పిటిషన్లపై విచారణ జరుపుతూ, పౌరుల ప్రజాస్వామ్య హక్కులను కాలరాసేలా పోలీసులు ప్రవర్తించకూడదని హెచ్చరించారు.
అదే సమయంలో నిరసనలలో అరాచకం సృష్టించే విద్రోహ శక్తులపై సుప్రీంకోర్టు ధర్మాసనం ఆందోళన వ్యక్తం చేసింది. శాంతియుత ఆందోళనల్లో ఆకతాయిలు ప్రవేశించి పోలీసు సిబ్బందిపై దాడులకు తెగబడటం సహించరానిదని న్యాయమూర్తి జస్టిస్ జోయ్మాల్య బాగ్చి వ్యాఖ్యానించారు. ప్రజాస్వామ్యంలో నిరసనకారులతో పాటు విధుల్లో ఉన్న పోలీసుల ప్రాణాలు కూడా ముఖ్యమైనవేనని, హింసకు తావులేకుండా ఆందోళనకారులు స్వీయ క్రమశిక్షణ పాటించాలని సూచించారు.
ఈ ఘటనలపై స్వతంత్ర దర్యాప్తు జరిపించాలని, సంఘటనా స్థలాల్లోని సీసీటీవీ ఫుటేజీలు, పోలీసుల బాడీ-కెమెరా రికార్డింగ్ల వంటి కీలక ఎలక్ట్రానిక్ సాక్ష్యాలను భద్రపరచాలని పిటిషనర్లు ధర్మాసనాన్ని కోరారు. పోలీసుల దౌర్జన్యంలో తీవ్రంగా గాయపడిన విద్యార్థులు, నిరసనకారులకు తగిన నష్టపరిహారం చెల్లించేలా కేంద్ర, రాష్ట్ర ప్రభుత్వాలను ఆదేశించాలని వారు అభ్యర్థించారు.
ఇక నీట్ (NEET), ఇతర పోటీ పరీక్షలను సురక్షితంగా, ఆన్లైన్ విధానంలో నిర్వహించాలన్న పిటిషన్లపైనా అత్యున్నత న్యాయస్థానం కీలక వ్యాఖ్యలు చేసింది. ఎన్టీఏ (NTA) నిర్వహించే పరీక్షల్లో ప్రశ్నపత్రాల లీకేజీని శాశ్వతంగా నివారించేందుకు కేంద్ర ప్రభుత్వం ఏర్పాటు చేసిన ఉన్నతస్థాయి టాస్క్ఫోర్స్ నివేదిక కోసం వేచి చూస్తున్నట్లు తెలిపింది.
నందన్ నీలేకని నేతృత్వంలోని ఈ ఉన్నతస్థాయి కమిటీ ఆన్లైన్ పరీక్షా విధానం, సాంకేతిక భద్రతా ప్రమాణాలపై ఇచ్చే సూచనలను పరిశీలించిన తర్వాతే దీనిపై తగిన ఉత్తర్వులు జారీ చేస్తామని సుప్రీంకోర్టు స్పష్టం చేసింది. డిజిటల్ విధానం వల్ల లీకేజీలను అరికట్టవచ్చా లేదా అన్నదానిపై ఈ నివేదిక కీలకం కానుంది.
మొత్తానికి, ఒకవైపు కేంద్ర ప్రభుత్వం ఇచ్చిన కేసుల ఎత్తివేత హామీ అమలు కాకపోవడం, మరోవైపు పోలీసుల మితిమీరిన చర్యలపై సుప్రీంకోర్టు ఆగ్రహం వ్యక్తం చేయడం వల్ల పేపర్ లీకేజీల సంక్షోభం మరింత సంక్లిష్టంగా మారింది. ఈ పిటిషన్లపై తదుపరి విచారణను మంగళవారానికి వాయిదా వేస్తున్నట్లు ధర్మాసనం ప్రకటించింది.
Also Read : ఆకలి తీర్చడమే ధ్యేయంగా నిలిచిన ‘జునైద్’: జంతర్ మంతర్ నిరసనల్లో అసలైన రియల్ హీరో!
