Ethanol Gas: భారత ఇంధన రంగంలో, ముఖ్యంగా సామాన్యుడి వంటగదిలో ఒక విప్లవాత్మక మార్పుకు కేంద్ర ప్రభుత్వం శ్రీకారం చుట్టబోతోంది. ఇప్పటివరకు వంట ఇంధనంగా ఏకఛత్రాధిపత్యం వహించిన లిక్విఫైడ్ పెట్రోలియం గ్యాస్ (LPG) పై ఆధారపడటాన్ని తగ్గించేందుకు కేంద్రం ఒక సంచలన ప్రణాళికను సిద్ధం చేస్తోంది. పెట్రోల్, డీజిల్లలో ఇథనాల్ బ్లెండింగ్ తర్వాత, ఇప్పుడు అదే ఇథనాల్ను ప్రధాన వంట ఇంధనంగా నేరుగా గృహ వినియోగంలోకి తీసుకురావడానికి సన్నాహాలు వేగవంతమయ్యాయి.
దేశంలో ప్రత్యామ్నాయ స్వచ్ఛ వంట విధానాన్ని రూపొందించడంలో పెట్రోలియం,సహజ వాయువుల మంత్రిత్వ శాఖ తీవ్రంగా శ్రమిస్తోంది. ఈ కొత్త విధానం ద్వారా LPGతో పాటుగా ఇథనాల్ను కూడా ప్రాథమిక వంట ఇంధనంగా అధికారికంగా గుర్తిస్తారు. దీనికి సంబంధించిన విధివిధానాలు, విధాన రూపకల్పన (Policy framework) ఈ ఏడాది సెప్టెంబర్ నాటికి పూర్తి కావచ్చని అంతర్గత వర్గాలు వెల్లడిస్తున్నాయి.
ప్రస్తుతం భారతదేశం తన వంట గ్యాస్ (LPG) అవసరాల కోసం సింహభాగం విదేశీ దిగుమతులపైనే ఆధారపడుతోంది. అంతర్జాతీయ మార్కెట్లో చమురు, గ్యాస్ ధరలు పెరిగిన ప్రతిసారీ దేశంలో సిలిండర్ ధరలు పెరిగి సామాన్యుడిపై భారం పడుతోంది. ఎల్పీజీ స్థానంలో దేశీయంగా లభించే ఇథనాల్ను ఉపయోగిస్తే, వేల కోట్ల రూపాయల విదేశీ మారక ద్రవ్యం ఆదా అవ్వడమే కాకుండా అంతర్జాతీయ గ్యాస్ సంక్షోభాల ప్రభావం భారతీయ కుటుంబాలపై పడకుండా ఉంటుంది.
Also Read : ఢిల్లీలో హైటెన్షన్…మోదీ ఇంటి వద్ద కాంగ్రెస్ నిరసన!
భారత్లో ఇథనాల్ ఉత్పత్తి సామర్థ్యం గణనీయంగా పెరిగింది. ప్రస్తుతం దేశంలో ఏటా దాదాపు 20 బిలియన్ లీటర్ల ఇథనాల్ ఉత్పత్తి సామర్థ్యం ఉండగా, త్వరలోనే ఇది మరో 4 బిలియన్ లీటర్లు పెరగనుంది. ఇందులో E20 పెట్రోల్ లక్ష్యం కోసం 11 బిలియన్ లీటర్లు, ఫార్మా, లిక్కర్, కెమికల్ పరిశ్రమలకు 3.5 బిలియన్ లీటర్లు పోగా.. ప్రతి ఏటా దాదాపు 7 బిలియన్ లీటర్ల ఇథనాల్ మిగిలిపోతోంది. ఈ మిగులు ఇథనాల్ను వంట ఇంధనంగా మళ్లించడం వల్ల ఇంధన వృథా అరికట్టబడుతుంది.
ఇథనాల్ అనేది చెరకు, మొక్కజొన్న, పాడైపోయిన ధాన్యాలు , వ్యవసాయ వ్యర్థాల నుండి తయారయ్యే పునరుత్పాదక ఇంధనం. వంట ఇంధనంగా ఇథనాల్ వినియోగం పెరిగితే, చక్కెర మిల్లులు, ఇథనాల్ డిస్టిలరీల డిమాండ్ పెరిగి రైతులకు తమ పంటలకు మంచి మద్దతు ధర లభిస్తుంది. ఇది గ్రామీణ ఆర్థిక వ్యవస్థను బలోపేతం చేయడమే కాకుండా, వ్యర్థాల నిర్వహణకు , పర్యావరణ పరిరక్షణకు ఎంతగానో దోహదపడుతుంది.
ఇథనాల్ ద్రవ రూపంలో ఉండే ఇంధనం కావడం వల్ల, దానిని సాధారణ LPG స్టవ్లలో వాడటం సాధ్యపడదు. అందుకోసం ప్రభుత్వ రంగ చమురు మార్కెటింగ్ కంపెనీలు (IOCL, BPCL, HPCL) , ప్రముఖ పరిశోధనా సంస్థలు కలసి ప్రత్యేకమైన ‘ఇథనాల్ కుకింగ్ స్టవ్లను’ (Ethanol Cookstoves) అభివృద్ధి చేస్తున్నాయి. ఇవి సాంప్రదాయ గ్యాస్ స్టవ్ల కంటే తక్కువ ప్రమాదకరమైనవిగా, అత్యంత సురక్షితమైనవిగా , పర్యావరణహితమైనవిగా రూపాందుతున్నాయి.
వినియోగదారులు సాంప్రదాయ ఎల్పీజీ సిలిండర్ల నుంచి ఇథనాల్ వంట విధానానికి మారేలా ప్రోత్సహించేందుకు కేంద్ర ప్రభుత్వం ఆకర్షణీయమైన పథకాలను పరిశీలిస్తోంది. ప్రారంభంలో ఇథనాల్ స్టవ్ల కొనుగోలుపై వినియోగదారులకు భారీ సబ్సిడీ ఇచ్చే ఆలోచనలో ఉంది. ఉజ్వల యోజన తరహాలోనే ఈ ఇథనాల్ వంట స్టవ్లను కూడా పేద, మధ్యతరగతి కుటుంబాలకు సులభంగా అందుబాటులోకి తేవాలని భావిస్తోంది.
ఇథనాల్ను ఇళ్లకు సరఫరా చేయడానికి ప్రభుత్వం సరికొత్త పంపిణీ వ్యవస్థను ఆలోచిస్తోంది. సాధారణ ఎల్పీజీ సిలిండర్ల హోమ్ డెలివరీతో పాటు, వినియోగదారులు నేరుగా స్థానిక పెట్రోల్ బంకుల నుంచే ప్రత్యేక క్యాన్లలో ఇథనాల్ను కొనుగోలు చేసే వెసులుబాటును తీసుకురానున్నారు. భవిష్యత్తులో పెట్రోల్ బంకుల్లో ఇథనాల్ డిస్పెన్సర్లు లేదా ప్రత్యేక కౌంటర్లు ఏర్పాటు చేయడం ద్వారా సరఫరాను చాలా సులభతరం చేయవచ్చని అంచనా వేస్తున్నారు.
వంటగదిలో ఇథనాల్ వినియోగం పర్యావరణానికి, గృహిణుల ఆరోగ్యానికి ఎంతో మేలు చేస్తుంది. LPGతో పోలిస్తే ఇథనాల్ మండేటప్పుడు కర్బన ఉద్గారాలు (Carbon emissions), విష వాయువులు దాదాపుగా వెలువడవు. ఇది వంటగదిలో ఇంట్లో ఉండే గాలి నాణ్యతను మెరుగుపరుస్తుంది. ముఖ్యంగా పొగ, ఇండోర్ కాలుష్యం వల్ల వచ్చే శ్వాసకోశ వ్యాధులను నివారించడంలో ఇథనాల్ కీలక పాత్ర పోషిస్తుంది.
కేంద్ర పెట్రోలియం మంత్రిత్వ శాఖ నుంచి త్వరలోనే దీనిపై అధికారిక ప్రకటన వెలువడే అవకాశం ఉంది. ప్రయోగాత్మక పరీక్షలు విజయవంతమై, సెప్టెంబర్లో పాలసీ ఖరారైతే, రాబోయే రోజుల్లో ‘ఇథనాల్ వంట గ్యాస్’ ప్రత్యామ్నాయంగా అందుబాటులోకి రావడం ఖాయం. ఇది నెరవేరితే గ్యాస్ సిలిండర్ ధరల భారం నుంచి సామాన్యుడికి శాశ్వత ఉపశమనం లభించడమే కాకుండా, ఇంధన రంగంలో భారత్ ‘ఆత్మనిర్భరత’ (స్వయంసమృద్ధి) సాధించే దిశగా మరో పెద్ద అడుగు పడినట్లవుతుంది.
Also Read : కొలిక్కిరాని సీజేపీ ఆందోళన…వాంగ్చుక్ ఆగ్రహం – దీక్ష కొనసాగింపు
