Shakti Sharma : భారత రక్షణ రంగంలో ఎయిర్ వైస్ మార్షల్ హోదా సాధించిన తొలి నాన్-మెడికల్ మహిళా అధికారిగా శక్తి శర్మ చరిత్ర సృష్టించారు. భారత రక్షణ దళాల్లో వైద్య విభాగానికి చెందని మహిళా అధికారుల్లో ఈ స్థాయికి చేరుకున్న తొలి వ్యక్తిగా ఆమె ప్రత్యేక గుర్తింపు పొందారు. సెప్టెంబర్ 1న మంగళవారం ఎయిర్ హెడ్క్వార్టర్స్లో అసిస్టెంట్ చీఫ్ ఆఫ్ ది ఎయిర్ స్టాఫ్ గా శక్తి శర్మ బాధ్యతలు చేపట్టారు. మహిళా అధికారులు భారత సాయుధ దళాల్లో ఉన్నత స్థాయికి ఎదుగుతున్న క్రమంలో ఇది కీలకమైన ముందడుగుగా నిలిచింది. ఈ విషయాన్ని భారత వైమానిక దళం ఎక్స్ లో వెల్లడించింది. శక్తి శర్మకు ఎయిర్ వైస్ మార్షల్ హోదా రావడం చారిత్రాత్మక ఘట్టమని పేర్కొంది. మూడు దశాబ్దాలకు పైగా ఆమె అందించిన సేవలను గుర్తు చేసింది.
శక్తి శర్మ 1994 జూన్ 18న భారత వైమానిక దళంలోని ఎడ్యుకేషన్ బ్రాంచ్లో అధికారిగా చేరారు. అప్పటి నుంచి శిక్షణ సంస్థలు, ఫీల్డ్ స్టేషన్లు, కమాండ్ హెడ్క్వార్టర్స్, ఎయిర్ హెడ్క్వార్టర్స్లో వివిధ బాధ్యతలు నిర్వహించారు. వైమానిక దళంలో పలు విభాగాల్లో పనిచేస్తూ విస్తృత అనుభవాన్ని సంపాదించారు. విద్యా రంగం, రక్షణ రంగానికి సంబంధించిన అంశాల్లో సంస్థల మధ్య సహకారాన్ని పెంచేందుకు కూడా ఆమె పలు కార్యక్రమాల్లో కీలక పాత్ర పోషించారు. ఐఐటీ కాన్పూర్, పుణే యూనివర్సిటీలో ఐఏఎఫ్ చైర్స్ ఆఫ్ ఎక్సలెన్స్ ఏర్పాటు చేయడంలో ఆమె ముఖ్యమైన పాత్ర పోషించారు. విద్యా రంగం, వ్యూహాత్మక రక్షణ అంశాల్లో ఈ సంస్థల మధ్య సహకారాన్ని పెంచడం ఈ కార్యక్రమాల ఉద్దేశం.
శక్తి శర్మ కెరీర్లో మరో ప్రత్యేకత కూడా ఉంది. మూడు సర్వీసులకు చెందిన అధికారుల్లో సైనిక్ స్కూల్కు కమాండర్గా వ్యవహరించిన తొలి మహిళా అధికారిగా ఆమె గుర్తింపు పొందారు. పంజాబ్లోని కపుర్తలా సైనిక్ స్కూల్కు ప్రిన్సిపాల్గా పనిచేశారు. భారత సైన్యంలో మహిళా అధికారులకు ప్రస్తుతం మరిన్ని అవకాశాలు లభిస్తున్నాయి. ఆపరేషనల్ బాధ్యతలతో పాటు కమాండ్, ఉన్నత స్థాయి నాయకత్వ బాధ్యతల్లోనూ మహిళలు ముందుకు వస్తున్నారు. ఈ సమయంలో శక్తి శర్మ ఎయిర్ వైస్ మార్షల్ హోదాకు చేరుకోవడం మరో కీలక మైలురాయిగా నిలిచింది.
ఎయిర్ హెడ్క్వార్టర్స్లో కొత్త బాధ్యతలు చేపట్టిన శక్తి శర్మ ఇకపై భారత వైమానిక దళంలో విద్యకు సంబంధించిన అంశాలను పర్యవేక్షించనున్నారు. ఆమె సాధించిన ఈ ఘనత రక్షణ రంగంలో ఉన్నత స్థాయి నాయకత్వ బాధ్యతల్లోకి మహిళలు మరింతగా వస్తున్నారనడానికి ఒక ముఖ్యమైన ఉదాహరణగా నిలిచింది. భవిష్యత్ తరాల మహిళా అధికారులకు శక్తి శర్మ కెరీర్ ఒక ప్రేరణగా నిలిచే అవకాశం ఉంది.
