హైదరాబాద్ క్రికెట్ అసోసియేషన్ (HCA) అత్యంత ప్రతిష్టాత్మకంగా నిర్వహిస్తున్న ‘టీజీ20 (TG20) లీగ్’ చుట్టూ క్రికెట్ రాజకీయాలు, చట్టపరమైన వివాదాలు ముసురుకున్నాయి. బీసీసీఐ (BCCI) నిబంధనలను బేఖాతరు చేస్తూ సాగుతోందంటున్న ఈ లీగ్కు బ్రాండ్ అంబాసిడర్లుగా, ప్రమోటర్లుగా వ్యవహరిస్తున్న సినీ, క్రీడా ప్రముఖులపై తెలంగాణ క్రికెట్ అసోసియేషన్ (TCA) చట్టపరమైన అస్త్రాలను ప్రయోగించింది. ఈ లీగ్ను ప్రమోట్ చేస్తున్న టాలీవుడ్ స్టార్ హీరో విజయ్ దేవరకొండతో పాటు పలువురు సెలబ్రిటీలకు టీసీఏ లీగల్ నోటీసులు జారీ చేయడం ఇప్పుడు క్రీడా, సినీ వర్గాలలో పెను సంచలనంగా మారింది.
భారత క్రికెట్ నియంత్రణ మండలి (BCCI) నుంచి ఎలాంటి ముందస్తు అనుమతులు, అధికారిక ఆమోదం లేకుండానే హెచ్సీఏ ఈ ‘టీజీ20 లీగ్’ను అక్రమంగా నిర్వహిస్తోందని తెలంగాణ క్రికెట్ అసోసియేషన్ గట్టిగా ఆరోపిస్తోంది. నిబంధనల ప్రకారం బోర్డు అనుమతి లేని ఏ లీగ్నైనా ప్రమోట్ చేయడం లేదా అందులో భాగస్వాములు కావడం చట్టరీత్యా నేరమని టీసీఏ స్పష్టం చేసింది. అంతేకాదు, ఈ లీగ్ మరుగున హెచ్సీఏ బైలాస్ (నిబంధనలు)కు విరుద్ధంగా వ్యవహరిస్తూ, వివిధ కార్పొరేట్ కంపెనీలతో రూ. వందల కోట్ల మేర వాణిజ్య ఒప్పందాలు, గుప్త వ్యాపారాలు చేస్తోందని టీసీఏ తీవ్రస్థాయిలో మండిపడింది.
ఈ టోర్నమెంట్ ప్రకటనలతో సాధారణ క్రీడా ప్రేమికులను, స్థానిక యువ క్రికెటర్లను పూర్తిగా తప్పుదోవ పట్టిస్తున్నారని టీసీఏ ఆవేదన వ్యక్తం చేసింది. ఇందులో భాగంగానే ఈ అక్రమ లీగ్కు మద్దతుగా నిలిచిన టాలీవుడ్ అగ్ర హీరోలు విజయ్ దేవరకొండ, విక్టరీ వెంకటేష్లతో పాటు అంతర్జాతీయ, ఐపీఎల్ స్టార్ క్రికెటర్లు మహ్మద్ సిరాజ్, తిలక్ వర్మ, అంబటి రాయుడులకు టీసీఏ అధికారికంగా నోటీసులు పంపింది. సెలబ్రిటీ హోదాలో ఉండి ఇలాంటి వివాదాస్పద లీగ్లను ప్రోత్సహించడం కరెక్ట్ కాదని అందులో హితవు పలికింది.
బీసీసీఐ నియమావళిని ఉల్లంఘిస్తూ జరుగుతున్న ఈ లీగ్ ప్రమోషన్ల వ్యవహారంలో సదరు ప్రముఖులు తమ నిర్ణయాన్ని తక్షణమే పునరాలోచించుకోవాలని, ఆయా బ్రాండ్ ప్రమోషన్ల నుంచి తప్పుకోవాలని టీసీఏ డిమాండ్ చేసింది. ఒకవేళ ఈ లీగల్ నోటీసులను బేఖాతరు చేస్తూ లీగ్ను ఇలాగే ప్రమోట్ చేస్తే గనుక, భవిష్యత్తులో తీవ్రమైన చట్టపరమైన పరిణామాలు మరియు కఠిన చర్యలు ఎదుర్కోవాల్సి వస్తుందని ఆ నోటీసులలో గట్టిగా హెచ్చరించింది. ఈ నోటీసుల పర్వంతో రాబోయే రోజుల్లో హెచ్సీఏ వర్సెస్ టీసీఏ వివాదం మరింత ముదిరేలా కనిపిస్తోంది.
