Vietnam Boat Accident: వియత్నాంలోని అత్యంత ప్రజాదరణ పొందిన పర్యాటక ప్రాంతమైన ‘ఫు క్వాక్’ (Phu Quoc) ద్వీపం సమీపంలో ఒక దారుణ ప్రమాదం చోటుచేసుకుంది. పలువురు భారతీయ పర్యాటకులతో వేగంగా వెళ్తున్న ఒక విహార నౌక సముద్రంలో మునిగిపోయింది. ఈ విషాదకర ఘటనలో తెలుగు రాష్ట్రాలకు చెందిన పర్యాటకులు ప్రాణాలు కోల్పోవడంతో ఇటు ఆంధ్రప్రదేశ్, అటు తెలంగాణల్లో తీవ్ర విషాదం నెలకొన్నది.
Also Read : బ్రిటన్లో ఉక్కపోతతో డాక్టర్లు ఉక్కిరి బిక్కిరి.. ఆపరేషన్లకు బ్రేక్
In a tragic incident, a boat carrying several Indian tourists has capsized near Phu Quoc Island in Vietnam a few hours ago.
Exact details of the incident are being ascertained as search and rescue operations by local authorities are ongoing.
In order to provide information…
— India in Vietnam (@AmbHanoi) July 11, 2026
ఒక ప్రముఖ మొబైల్ తయారీ సంస్థ తెలుగు రాష్ట్రాల్లోని తమ వ్యాపార పురోగతికి గుర్తింపుగా డిస్ట్రిబ్యూటర్లకు ఈ వియత్నాం పర్యటనను నిర్వహించినట్లు ప్రాథమిక సమాచారం ద్వారా తెలుస్తోంది. మొత్తం 250 మందికి పైగా డిస్ట్రిబ్యూటర్లను ప్రత్యేక బృందాలుగా విభజించి, మూడు వేర్వేరు పడవల ద్వారా ఫు క్వాక్ దీవికి తీసుకెళ్లారు. అయితే ఉదయం సుమారు 10:30 గంటల సమయంలో, అందులో ఒక బోటు ఊహించని రీతిలో ప్రమాదానికి గురై నీటిలో మునిగిపోయింది.
ఈ ప్రమాదం జరిగిన నిర్దిష్ట బోటులో సుమారు 32 నుండి 80 మంది వరకు పర్యాటకులు ఉన్నట్లు విభిన్న వర్గాల అంచనాలు చెబుతున్నాయి. సముద్రంలో ఉద్ధృతంగా ఉన్న అలలు లేదా సాంకేతిక లోపం వల్ల బోటు ఒక్కసారిగా తిరగబడిందా అనే కోణంలో దర్యాప్తు జరుగుతోంది. నీటిలో చిక్కుకున్న వారిని కాపాడేందుకు సహాయక బృందాలు తక్షణమే రంగంలోకి దిగినప్పటికీ, బలమైన గాలి, అలల దాటికి ప్రాణనష్టం గణనీయంగా పెరిగింది.
లభించిన సమాచారం ప్రకారం, ఈ దుర్ఘటనలో దాదాపు 18 మంది వరకు మరణించినట్లు తెలుస్తోంది. మృతులలో ఆంధ్రప్రదేశ్ , తెలంగాణ ప్రాంతాలకు చెందిన పర్యాటకులు అత్యధిక సంఖ్యలో ఉన్నారు. సమాచారం అందుతున్న కొద్దీ మృతుల సంఖ్య, వారి వివరాలు మరింత పెరిగే అవకాశం ఉందని అక్కడి అధికారులు భావిస్తున్నారు.
ఈ ప్రమాదంలో మరణించిన వారి వివరాల్లో… మచిలీపట్నానికి చెందిన జయశ్రీ అక్కడిక్కడే ప్రాణాలు కోల్పోగా, ఆమె భర్త కిశోర్ తీవ్ర గాయాలతో ఆసుపత్రిలో అత్యవసర చికిత్స పొందుతున్నారు. అలాగే కడప జిల్లాకు చెందిన శ్రీధర్ కూడా ఈ ప్రమాదంలో మృతి చెందినట్లు నిర్ధారణ అయింది. ఆంధ్రప్రదేశ్కు చెందిన మరో ముగ్గురు పర్యాటకులు సముద్రంలో గల్లంతవడంతో వారి కోసం గాలింపు వేగవంతం చేశారు.
Also Read : స్పెయిన్లో కార్చిచ్చు.. 11 మంది దుర్మారణం..వందలాదిమంది నిరాశ్రయులు
ప్రమాద వార్త తెలిసిన వెంటనే వియత్నాంలో ఉన్న భారత రాయబార కార్యాలయం (Indian Embassy) వేగంగా స్పందించింది. ఈ సంఘటనపై తీవ్ర దిగ్భ్రాంతి వ్యక్తం చేస్తూ, సోషల్ మీడియా వేదికగా ప్రకటన విడుదల చేసింది. వియత్నాం స్థానిక ప్రభుత్వం, కోస్ట్ గార్డ్ మరియు రెస్క్యూ విభాగాలతో నిరంతరం సంప్రదింపులు జరుపుతూ గాలింపు చర్యలను ప్రత్యక్షంగా పర్యవేక్షిస్తున్నామని తెలిపింది.
బాధిత కుటుంబాలకు వేగవంతమైన సమాచారం అందించడానికి, అత్యవసర వైద్య లేదా ఇతర సహాయాలు అందించడానికి భారత రాయబార కార్యాలయం ప్రత్యేక కంట్రోల్ రూమ్లను అందుబాటులోకి తెచ్చింది. హో చి మిన్ సిటీలోని కాన్సులేట్ జనరల్ కార్యాలయంతో పాటు దేశ రాజధాని హనోయిలో కూడా ప్రత్యేక కంట్రోల్ రూమ్లు నిరంతరం పనిచేసేలా ఏర్పాటు చేశారు.
బాధితుల బంధువులు, కుటుంబ సభ్యులు సమాచారం కోసం సంప్రదించాల్సిన అత్యవసర ఫోన్ నంబర్లను వియత్నాం కాన్సులేట్ జనరల్ విడుదల చేసింది.
హో చి మిన్ సిటీ కంట్రోల్ రూమ్ నంబర్లు: +84 36 281 7930, +84 91 552 37 14, +84 33 452 0414.
ఈ నంబర్ల ద్వారా బాధిత కుటుంబాలు తమ వారి క్షేమ సమాచారాన్ని, ప్రస్తుత పరిస్థితిని నేరుగా తెలుసుకోవచ్చని సూచించారు.
వియత్నాంలోని ఫు క్వాక్ దీవి తెలుపు రంగు ఇసుక తిప్పలు, స్వచ్ఛమైన నీటికి ప్రపంచవ్యాప్తంగా ప్రసిద్ధి చెందింది. ప్రతి ఏటా లక్షలాది మంది విదేశీ పర్యాటకులు ఇక్కడికి వస్తుంటారు. అయితే, ఈ ఘోర ప్రమాదంతో పర్యాటక నౌకల్లో పాటించాల్సిన సురక్షతా ప్రమాణాలు, లైఫ్ జాకెట్ల వినియోగం, సముద్ర వాతావరణ ముందస్తు హెచ్చరికల అమలుపై మరోసారి తీవ్రమైన చర్చ మొదలైంది.
స్వదేశంలో ఉన్న పర్యాటకుల కుటుంబసభ్యులు, బంధువులు తమ వారి ఆచూకీ కోసం తీవ్ర ఆందోళనతో ఎదురుచూస్తున్నారు. ప్రమాదంలో మరణించిన వారి మృతదేహాలను త్వరగా స్వదేశానికి తీసుకురావడానికి, గాయపడిన వారికి మెరుగైన వైద్యం అందించడానికి కేంద్ర ప్రభుత్వం మరియు తెలుగు రాష్ట్రాల ప్రభుత్వాలు రాయబార కార్యాలయంతో మాట్లాడి చర్యలు వేగవంతం చేస్తున్నాయి.
