Abhijeet Dipke : ఢిల్లీలోని జంతర్ మంతర్ వద్ద ఇటీవల నీట్ (NEET) పేపర్ లీకేజీకి వ్యతిరేకంగా జరిగిన విద్యార్థుల నిరసనల సందర్భంగా ప్రధానమంత్రి నరేంద్ర మోదీని ఉద్దేశించి కొందరు విద్యార్థులు చేసిన వ్యాఖ్యలు దేశవ్యాప్తంగా తీవ్ర చర్చనీయాంశమయ్యాయి. ఈ వివాదంపై ప్రధాని మోదీ స్పందిస్తూ ఇన్స్టాగ్రామ్ వేదికగా ఒక వీడియోను విడుదల చేశారు. అయితే ప్రధాని ప్రకటనపై కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే తీవ్రస్థాయిలో ధ్వజమెత్తారు.
Also Read : వ్యాపారులకు బిగ్ రిలీఫ్: భారీగా తగ్గిన కమర్షియల్ గ్యాస్ సిలిండర్
View this post on Instagram
విద్యార్థులను క్షమిస్తున్నట్లు ప్రధాని చేసిన ప్రకటనపై అభిజీత్ దిప్కే సోషల్ మీడియా ద్వారా ప్రశ్నించారు. “కేవలం ఇన్స్టాగ్రామ్ రీల్స్, వీడియోలలోనే క్షమించామని చెప్తారా? లేక నిరసనల్లో పాల్గొన్న విద్యార్థులపై నమోదైన కేసులను కూడా ప్రభుత్వం ఉపసంహరించుకుంటుందా?” అని నిలదీశారు. అలాగే చట్టం అందరికీ సమానంగా ఉందో లేదో ప్రశ్నిస్తూ.. ఉత్తరప్రదేశ్ ముఖ్యమంత్రి ఒక కెమెరామెన్పై అనుచిత పదజాలం ఉపయోగించిన ఉదంతాన్ని గుర్తుచేస్తూ, దేశంలో యువతకు ఒక రకమైన చట్టం, అధికారంలో ఉన్న నాయకులకు మరొక చట్టం ఉందా అని విమర్శించారు.
జంతర్ మంతర్ నిరసనల్లో తనను, తన తల్లిని కొందరు విద్యార్థులు తీవ్రంగా దూషించిన సంగతిపై ప్రధాని స్పందిస్తూ.. ఆ విద్యార్థులను తాను మనస్ఫూర్తిగా క్షమిస్తున్నట్లు వెల్లడించారు. యువతను శిక్షించడం కంటే వారిని సరైన మార్గంలో నడిపించడమే సమాజ బాధ్యత అని మోదీ వ్యాఖ్యానించారు. కాగా, ప్రధానిపై అనుచిత వ్యాఖ్యలు చేసిన ఆరోపణలతో నోయిడాకు చెందిన ఒక బాలికపై కేసు నమోదు కాగా, ఆమె తాజాగా మరొక వీడియో విడుదల చేసి తన వ్యాఖ్యలకు పశ్చాత్తాపం వ్యక్తం చేస్తూ దేశ ప్రజలకు, ప్రధానికి క్షమాపణలు చెప్పింది.
Also Read : రెండేళ్లుగా ఆస్ట్రేలియాలో ఉన్నాడని నమ్మించి…. భర్తను చంపి పాతిపెట్టిన భార్య
ఇదిలా ఉంటే, నీట్ పేపర్ లీకేజీపై సీజేపీ ఆధ్వర్యంలో జరిగిన ఈ పోరాటంలో ప్రముఖ పర్యావరణవేత్త సోనమ్ వాంగ్చుక్ త్యాగం మరవలేనిదని అభిజీత్ దిప్కే ప్రశంసించారు. విద్యాశాఖ మంత్రి ధర్మేంద్ర ప్రధాన్ రాజీనామా వరకు పరిస్థితులు రావడానికి వాంగ్చుక్ చేపట్టిన ఆమరణ నిరాహార దీక్షే ప్రధాన కారణమని చెప్పారు. ఆయన 26 రోజుల పాటు తన ప్రాణాలను పణంగా పెట్టి నిరాహార దీక్ష చేసి దేశ యువతను చైతన్యపరిచారని గుర్తుచేశారు.
సోనమ్ వాంగ్చుక్కు, సీజేపీకి అలాగే అభిజీత్ దిప్కేకు మధ్య తీవ్ర విభేదాలు తలెత్తాయంటూ వస్తున్న వార్తలపై మీడియా అడిగిన ప్రశ్నలకు ఆయన స్పష్టత ఇచ్చారు. తమ మధ్య ఎలాంటి విభేదాలూ లేవని తేల్చిచెప్పారు. వాంగ్చుక్ దీక్ష విరమించాలని తానే వ్యక్తిగతంగా విజ్ఞప్తి చేశానని, ఆయన దీక్ష విరమించిన రోజున తాను ఎంతో ఉపశమనం పొందినట్లు వివరించారు. దేశ భవిష్యత్తుకు సోనమ్ వాంగ్చుక్ జీవితం ఎంతో విలువైనదని అభిప్రాయపడ్డారు.
కేంద్ర మంత్రులు జేపీ నద్దా, జితేంద్ర సింగ్ల సమక్షంలో వాంగ్చుక్ దీక్ష విరమించడంపై స్పందిస్తూ.. ఆ విషయంలో తనకు నిరాశ లేదని, అయితే మంత్రులను కలవడానికి అనుమతించిన పోలీసులు, తనను, ప్రతిపక్ష ఎంపీలను మాత్రం వాంగ్చుక్ను కలిసేందుకు అనుమతించకపోవడంపై తీవ్ర అసంతృప్తి వ్యక్తం చేశారు. ప్రజా ఉద్యమం చేసిన తమను పక్కనపెట్టి, కేంద్ర మంత్రులకే ఎందుకు ప్రాధాన్యం ఇచ్చారని దిప్కే ప్రశ్నించారు.
కాక్రోచ్ జనతా పార్టీ (CJP)ని ప్రత్యక్ష రాజకీయ పార్టీగా మార్చే ఉద్దేశం ప్రస్తుతానికి తనకు ఏమాత్రం లేదని అభిజీత్ దిప్కే స్పష్టం చేశారు. నేరుగా ఎన్నికల్లో పోటీ చేసి అధికారం చేపట్టడం కంటే, దేశంలో, ప్రస్తుత రాజకీయ వ్యవస్థలో సానుకూల మార్పులు తీసుకురావడమే తమ ప్రధాన ధ్యేయమని ఈ సందర్భంగా పునరుద్ఘాటించారు.
ప్రధానమంత్రి నరేంద్ర మోదీ వీడియో ద్వారా క్షమాపణ ధోరణిని కనబరిచినప్పటికీ, నిరసనల్లో పాల్గొన్న విద్యార్థులపై నమోదైన పోలీసు కేసులను ఉపసంహరించుకుంటారా లేదా అనేది స్పష్టం కాలేదు. సీజేపీ అధినేత అభిజీత్ దిప్కే లేవనెత్తిన ప్రశ్నలతో ఇప్పుడు కేంద్ర ప్రభుత్వం మరియు హోంశాఖ ఈ కేసుల విషయంలో ఎలాంటి తుది నిర్ణయం తీసుకుంటుందనే అంశంపై విద్యార్థులు, వ్యాపార-రాజకీయ వర్గాల్లో ఆసక్తి నెలకొంది.
