Foreign Students : ఉన్నత చదువులు చదివి, నచ్చిన రంగంలో ఉద్యోగం సంపాదించి అమెరికాలో స్థిరపడాలని భావించే వేలాది మంది భారతీయ విద్యార్థుల ఆశలపై మళ్లీ కష్టాల మబ్బులు అలుముకుంటున్నాయి. హెచ్-1బీ వీసాతో పాటు గ్రీన్కార్డ్ కోసం ఏళ్లకు ఏళ్లు నిరీక్షిస్తున్న వారికి వరుస షాక్లు ఇస్తున్న అమెరికా అధ్యక్షుడు డొనాల్డ్ ట్రంప్, తాజాగా విదేశీ విద్యార్థులను లక్ష్యంగా చేసుకుంటూ మరో కఠిన నిర్ణయానికి తెరదీశారు. చదువు పూర్తయ్యాక ఇచ్చే ఆప్షనల్ ప్రాక్టికల్ ట్రైనింగ్ (ఓపీటీ) పొందాలంటే ఏకంగా $100,000 (సుమారు రూ. 90 నుంచి 95 లక్షలు) భారీ ఫీజు విధించే దిశగా ట్రంప్ యంత్రాంగం ప్రతిపాదనలను పరిశీలిస్తోంది.
సాధారణంగా ఎఫ్-1 వీసాపై అమెరికా వెళ్లే విదేశీ విద్యార్థులు తమ యూఎస్ విశ్వవిద్యాలయాల్లో గ్రాడ్యుయేషన్ లేదా పీజీ పూర్తి చేసిన తర్వాత ఆచరణాత్మక అనుభవం పొందేందుకు ఓపీటీ (OPT) ఎంతో దోహదపడుతుంది. అండర్ గ్రాడ్యుయేషన్ పూర్తయ్యాక సైన్స్, టెక్నాలజీ, ఇంజినీరింగ్, గణితశాస్త్రం (STEM) కోర్సుల్లో ఎంఎస్ చదివే విద్యార్థులకు ఈ ప్రోగ్రామ్ కింద 1 నుండి 3 ఏళ్ల పాటు అక్కడే ఉండి పనిచేసే వెసులుబాటు లభిస్తుంది. ఇతర సాధారణ కోర్సుల వారికి ఏడాది పాటు అనుమతి ఉంటుంది. అయితే, లక్ష డాలర్ల భారీ రుసుము అమల్లోకి వస్తే ఓపీటీ సాధించడం అసాధ్యంగా మారి విద్యార్థులు తమ కలలను వదులుకోవాల్సి వస్తుంది.
భారతదేశం నుంచి ఏటా వేలాది మంది విద్యార్థులు లక్షల రూపాయలు రుణాలుగా పొంది యూఎస్ ఎంఎస్ కోర్సుల్లో చేరుతుంటారు. పీజీ పూర్తయిన తర్వాత లభించే ఓపీటీ సమయంలోనే ప్రతిభ కలిగిన అభ్యర్థులు అక్కడి కంపెనీలలో ఉద్యోగాలు సాధిస్తుంటారు. తొలి ఏడాది సంబంధిత విభాగంలో పనిచేస్తూ, ఆ తర్వాత లభించే అదనపు రెండేళ్ల గడువులో ఉద్యోగావకాశాలను మరింత మెరుగుపరుచుకుని కంపెనీల ద్వారా హెచ్-1బీ వీసాకు దరఖాస్తు చేసుకుంటారు. ఒకరకంగా ఓపీటీ అనేది హెచ్-1బీ వీసా సాధించడానికి ప్రధాన వారధిగా నిలుస్తోంది.
తన ఎన్నికల ప్రచారంలో ఇచ్చిన ‘అమెరికన్ ఫస్ట్’ హామీని నిలబెట్టుకోవడంలో భాగంగానే ట్రంప్ ఈ నిర్ణయాలకు వేగంగా అడుగులు వేస్తున్నారు. విదేశీ ఉద్యోగులపై ఆధారపడటాన్ని తగ్గించి, స్థానిక అమెరికన్లకే ఉద్యోగ అవకాశాలు దక్కేలా చేయడమే ఈ కఠిన నిబంధనల ముఖ్య ఉద్దేశమని భావిస్తున్నారు. భారీ మొత్తంలో రుసుము విధిస్తే అధిక సంఖ్యలో విదేశీ విద్యార్థులు అమెరికాలో ఉద్యోగ ప్రయత్నాలను స్వచ్ఛందంగా విరమించుకుంటారని యూఎస్ ప్రభుత్వం అంచనా వేస్తోంది.
Also Read : పాకిస్తాన్ లో కాక్రోచ్ పార్టీ… మెరుగైన పరిపాలన, పారదర్శక రాజకీయమే ఎజెండా
హెచ్-1బీ వీసాలపై కూడా గతంలో ట్రంప్ ప్రభుత్వం లక్ష డాలర్ల ఫీజును విధించేందుకు ప్రయత్నించగా, దాన్ని ఫెడరల్ కోర్టు అడ్డుకున్న సంగతి విదితమే. విదేశీ నిపుణులపై విధించే రుసుములపై కోర్టులలో ఎదురుదెబ్బ తగలడంతో, ఈసారి దాన్ని అధిగమించేందుకు విద్యార్థుల ఓపీటీ మార్గాన్ని లక్ష్యంగా చేసుకుని సరికొత్త ప్రతిపాదనలను రూపొందించినట్లు అమెరికా మీడియా కథనాలు వెల్లడిస్తున్నాయి.
ఈ నూతన నిబంధనలు గనుక అమల్లోకి వస్తే అత్యధికంగా నష్టపోయేది భారతీయ యువతే. ప్రస్తుతం యూఎస్ వర్సిటీల్లో చదువుతున్న విదేశీ విద్యార్థుల్లో భారతీయుల వాటా గణనీయంగా ఉంది. భారత్లో బ్యాంక్ రుణాలు, ఆస్తులు తాకట్టు పెట్టి ఎన్నో ఆశలతో అమెరికా గడ్డపై అడుగుపెట్టిన సామాన్య, మధ్యతరగతి కుటుంబాల విద్యార్థులకు లక్ష డాలర్ల (రూ. 95 లక్షలు) అదనపు ఫీజు చెల్లించడం ఏమాత్రం సాధ్యమయ్యే పని కాదు.
ఉపాధి అవకాశాలు మసకబారితే అమెరికా వైపు వెళ్లే భారతీయ విద్యార్థుల సంఖ్య భవిష్యత్తులో దారుణంగా పడిపోయే ప్రమాదముందని విద్యా రంగ నిపుణులు హెచ్చరిస్తున్నారు. భారతీయ విద్యార్థుల రుసుములపైనే ఎక్కువగా ఆధారపడే అమెరికన్ విశ్వవిద్యాలయాల ఆదాయ మార్గాలకు కూడా ఇది గొడ్డలిపెట్టుగా మారే అవకాశముంది. ఇప్పటికే చాలామంది విద్యార్థులు ప్రత్యామ్నాయంగా కెనడా, జర్మనీ, ఆస్ట్రేలియా వంటి దేశాల వైపు దృష్టి సారిస్తున్నారు.
ప్రస్తుతం అమెరికాలో ఓపీటీ పూర్తి చేసుకుంటూ లేదా చదువు ముగించే దశలో ఉన్న వేలాది మంది భారతీయ విద్యార్థులు ఈ ప్రతిపాదన వార్తలతో తీవ్ర ఆందోళనకు గురవుతున్నారు. ఒకవేళ ఈ నిర్ణయం గనుక కార్యరూపం దాల్చితే, చేసిన అప్పులు ఎలా తీర్చాలో తెలియక, సొంత దేశానికి తిరిగి రావాలో లేక అక్కడే మరేదైనా దారి వెతుక్కోవాలో అర్థం కాక దిక్కుతోచని స్థితిలో కొట్టుమిట్టాడుతున్నారు.
Also Read : సముద్ర మార్గ వ్యాపార రక్షణ కోసం.. 14 దేశాలతో సౌదీ అరేబియా నావికాదళ కూటమి
